سعودی عرب میں حج کی تیاریاں مکمل ، مکہ مکرمہ میں سیکیورٹی فورسز کی شاندار پریڈ

مکہ مکرمہ، 22 مئی (یو این آئی) حج کے مقدس موقع پر مکہ مکرمہ میں سعودی عرب کی سیکیورٹی فورسز نے ایک شاندار اور منظم پریڈ کا انعقاد کیا، جس میں فوجی دستوں، پولیس یونٹس اور اسپیشل کمانڈوز نے بھرپور شرکت کی۔
تفصیلات کے مطابق سعودی عرب میں رواں سال حج کے بابرکت اور مقدس موقع کے لیے تمام تر تیاریاں اور انتظامات مکمل کر لیے گئے ہیں۔ دنیا بھر سے آنے والے 20 لاکھ سے زائد عازمینِ حج کی حفاظت، سلامتی اور مناسک کی پرسکون ادائیگی کو یقینی بنانے کے لیے مکہ مکرمہ میں سیکیورٹی فورسز کی ایک شاندار اور منظم مشترکہ پریڈ کا انعقاد کیا گیا۔
سپریم حج کمیٹی کے چیئرمین اور سعودی وزیرِ داخلہ شہزادہ عبدالعزیز بن سعود بن نایف نے حج سیکیورٹی فورسز کی حتمی تیاریوں کا تفصیلی جائزہ لیا۔ انہوں نے حج سیزن کے لیے منظور شدہ فیلڈ اور انتظامی منصوبوں پر عمل درآمد کا معائنہ کیا، تقریب میں ڈائریکٹر پبلک سیکیورٹی اور حج سیکیورٹی کمیٹی کے چیئرمین محمد البسامی نے خطاب کرتے ہوئے واضح کیا کہ خادم الحرمین الشریفین اور سعودی قیادت نے حجاج کرام کی خدمت اور سہولت کے لیے اپنے تمام تر وسائل اور صلاحیتیں وقف کر رکھی ہیں۔
مکہ مکرمہ میں ہونے والی اس تقریب میں فوجی دستوں، پولیس یونٹس اور اسپیشل کمانڈوز نے بھرپور شرکت کی۔ فورسز نے کسی بھی ہنگامی صورتحال سے نمٹنے کے لیے اپنی تیاریوں، آپریشنل صلاحیتوں اور حجاج کی حفاظت کے عزم کا عملی مظاہرہ پیش کیا۔ تقریب کے دوران جدید ترین دفاعی سیکیورٹی گاڑیوں اور فیلڈ سپورٹ گاڑیوں کی نمائش کی گئی، سیکیورٹی ایوی ایشن کی معاونت کے ساتھ ہیلی کاپٹروں نے فضائی مانیٹرنگ کی مشقیں کیں۔ مکہ اور مدینہ دونوں مقدس شہروں میں عازمین کو پرامن ماحول فراہم کرنے کے لیے اسپیشل فورسز کے دستوں نے پیشہ ورانہ مہارت دکھائی۔
حج کے موقع پر رش کو کنٹرول کرنے اور سیکیورٹی کو فول پروف بنانے کے لیے اس بار جدید ترین ٹیکنالوجی کا بڑے پیمانے پر استعمال کیا جا رہا ہے۔ ترجمان کے مطابق عازمینِ حج کی نگرانی اور سفری سہولیات کے لیے مصنوعی ذہانت کے ٹولز اور مختلف جدید ڈیجیٹل ایپس کی مدد لی جائے گی، تاکہ مناسکِ حج کے دوران نظم و ضبط برقرار رکھا جا سکے۔