سرینگر میں منشیات فروش سے منسلک غیر قانونی جائیداد مسمار:پولیس
ایجنسیز
سرینگر؍۲۰مئی
جموں و کشمیر پولیس نے بدھ کے روز جموں ضلع میں بین الاقوامی سرحد کے قریب مبینہ طور پر ڈرون کے ذریعے گرائی گئی تقریباً۲ کلو ہیروئن ضبط کر لی۔ حکام نے یہ جانکاری دی۔
پولیس نے بتایا کہ یہ کھیپ بشناہ سیکٹر میں پولیس ٹیموں نے ایک ہفتہ طویل نگرانی آپریشن کے بعد برآمد کی، جو سرحد پار منشیات اسمگلنگ سے متعلق مخصوص خفیہ اطلاعات کی بنیاد پر شروع کیا گیا تھا۔
حکام کے مطابق یہ پیکٹ بہادر خان پنچایت، بشناہ علاقے سے اُس وقت برآمد ہوا جب ایک مقامی کسان نے کھیت میں ہل چلاتے وقت مشتبہ شے دیکھی۔
اطلاع ملتے ہی بارڈر سیکورٹی فورس (بی ایس ایف) اور پولیس کی ٹیمیں موقع پر پہنچ گئیں اور علاقے کا محاصرہ کر لیا گیا۔
حکام نے بتایا کہ پولیس نے مشتبہ علاقوں میں چوبیس گھنٹے نگرانی برقرار رکھی ہوئی تھی اور منشیات کی اس کھیپ کو اپنے مطلوبہ وصول کنندگان تک پہنچنے سے پہلے ہی ضبط کر لیا گیا۔
ایک افسر نے کہا، ’’آپریشن کے دوران تقریباً ڈیڑھ سے دو کلو وزنی ہیروئن کی ایک بڑی کھیپ برآمد کی گئی۔‘‘انہوں نے مزید بتایا کہ فارنسک سائنس لیبارٹری (ایف ایس ایل) کی ایک ٹیم کو برآمد شدہ منشیات کے سائنسی معائنے اور شواہد جمع کرنے کیلئے موقع پر روانہ کیا گیا۔
حکام کے مطابق اسمگلنگ آپریشن میں ملوث پاکستانی نیٹ ورک کے آگے اور پیچھے کے روابط کا پتہ لگانے کیلئے جامع تحقیقات شروع کر دی گئی ہیں۔
ادھر ’’نشہ مکت جموں و کشمیر ابھیان‘‘ کے تحت منشیات اسمگلنگ اور نشہ آور سرگرمیوں کے خلاف اپنی سخت مہم جاری رکھتے ہوئے سرینگر پولیس نے منگل کے روز لال بازار علاقے میں ایک مطلوب منشیات فروش سے مبینہ طور پر منسلک تقریباً ڈیڑھ کروڑ روپے مالیت کی غیر قانونی جائیداد کو مسمار کر دیا۔
حکام نے بتایا کہ پولیس اسٹیشن لال بازار نے ہاکہ بازار، لال بازار میں سرکاری زمین پر تعمیر کی گئی دو منزلہ غیر قانونی عمارت، اس کے ساتھ بنے ایک کمرے اور غسل خانے کو منہدم کیا۔
پولیس کے مطابق یہ جائیداد تقریباً نو مرلہ اراضی پر پھیلی ہوئی تھی اور مبینہ طور پر مطلوب منشیات فروش ارشد احمد شیخ ولد ولی محمد شیخ، ساکن ہاکہ بازار لال بازار، سے منسلک تھی، جو نارکوٹک ڈرگز اینڈ سائیکو ٹراپک سبسٹینسز (این ڈی پی ایس) ایکٹ کے تحت درج کئی مقدمات میں ملوث بتایا جاتا ہے۔
پولیس نے بتایا کہ ملزم درج ذیل مقدمات میں ملوث ہے:ایف آئی آر نمبر۳۱/۲۰۲۵ دفعات۸/۲۱؍ اور۲۲؍ این ڈی پی ایس ایکٹ، درج پولیس اسٹیشن جانی پور، جموں۔ایف آئی آر نمبر۵۰/۲۰۲۵ ‘ دفعہ۸/۲۰؍ این ڈی پی ایس ایکٹ، درج پولیس اسٹیشن لال بازار۔
یہ انہدامی کارروائی ایگزیکٹو مجسٹریٹ خانیار اور سرینگر میونسپل کارپوریشن کے حکام کی موجودگی میں انجام دی گئی۔
حکام نے کہا کہ یہ کارروائی قانونی تقاضوں کے عین مطابق منشیات کے کاروبار سے حاصل ہونے والے غیر قانونی اثاثوں اور مالیاتی نیٹ ورکس کو ختم کرنے کی جاری کوششوں کے تحت کی گئی۔
پولیس کے مطابق پورا آپریشن مناسب نگرانی میں پُرامن طریقے سے انجام دیا گیا۔
سرینگر پولیس نے معاشرے سے منشیات کی لعنت کے خاتمے کے اپنے عزم کا اعادہ کرتے ہوئے عوام سے اپیل کی کہ وہ اپنے علاقوں میں منشیات فروشی اور دیگر غیر قانونی سرگرمیوں کے بارے میں معلومات فراہم کرکے قانون نافذ کرنے والے اداروں کے ساتھ تعاون کریں۔
