لاس اینجلس،19 مئی (یو این آئی ) فٹ بال ورلڈ کپ 2026 کے آغاز سے چند ہفتے قبل، لاس اینجلس کے صوفی اسٹیڈیم کے ملازمین نے وفاقی امیگریشن ایجنٹوں کی ممکنہ تعیناتی کے خلاف ہڑتال کا اعلان کر دیا ہے۔ ملازمین کا کہنا ہے کہ اگر اسٹیڈیم میں ‘آئس’امیگریشن اینڈ کسٹمز انفورسمنٹ ( آئی سی ای) کے اہلکار تعینات کیے گئے تو وہ کام چھوڑ دیں گے۔ ورکرز کی نمائندہ تنظیم ‘یونائیٹ ہیئر لوکل جو تقریباً 2,000 ملازمین کی ترجمانی کر رہی ہے، نے مطالبہ کیا ہے کہ وفاقی حکومت اس بات کی ضمانت دے کہ ٹورنامنٹ کے دوران امیگریشن اینڈ کسٹمز انفورسمنٹ ( آئی سی ای) کا کوئی عمل دخل نہیں ہوگا۔ملازمین کا موقف ہے کہ ‘آئس’ کی موجودگی سے نہ صرف عملے بلکہ شائقین میں بھی خوف و ہراس پھیلے گا۔ملازمین نے فیفا سے مطالبہ کیا ہے کہ ایکریڈیشن کے عمل کے دوران حاصل کردہ ان کی ذاتی معلومات ‘آئس’ یا کسی بھی غیر ملکی انٹیلی جنس ایجنسی کے ساتھ شیئر نہ کی جائیں۔اس احتجاج کو کیلیفورنیا کے گورنر کے عہدے کے امیدوار ٹام اسٹائر کی حمایت بھی حاصل ہو گئی ہے۔ انہوں نے سوال اٹھایا کہ سرحدوں کی نگرانی کرنے والے ادارے کا ورلڈ کپ جیسے کھیلوں کے ایونٹ میں کیا کام؟ انہوں نے ‘آئس’ کو مزدوروں کے لیے ایک "خطرہ” قرار دیا۔”ہم کام پر آتے ہوئے یا گھر جاتے ہوئے گرفتاری کے خوف میں نہیں جینا چاہتے۔ اگر معاہدہ نہ ہوا تو ہم ہڑتال کے لیے تیار ہیں۔
