قاضی گنڈ میں منشیات فروش سے ایک کنال سرکاری اراضی واگزار کرالی گئی:پولیس
ویب ڈیسک
سرینگر؍۱۱مئی
جموں و کشمیر انتظامیہ اور پولیس نے پیر کے روز ضلع کٹھوعہ میں انسدادِ منشیات مہم کے تحت بڑی کارروائی کرتے ہوئے مبینہ منشیات فروشوں کے تین مکانات منہدم کر دیے۔ حکام نے یہ جانکاری دی۔
حکام کے مطابق منہدم کیے گئے ڈھانچے راجباغ کے کورے پُنّو علاقے میں سرکاری زمین پر غیر قانونی طور تعمیر کیے گئے تھے۔
انہوں نے بتایا کہ یہ کارروائی لیاقت علی عرف ’’لیاقتو‘‘ اور اس کے بھائیوں گگو دین اور شام دین کی جائیدادوں کے خلاف انجام دی گئی، جو ضلع کٹھوعہ کی تحصیل مرہین کے علاقے کورے پُنّو کے رہائشی ہیں۔
حکام کا کہنا ہے کہ مذکورہ افراد منشیات فروشی اور دیگر جرائم سے متعلق۱۶ایف آئی آرز میں ملوث ہیں۔ ان کے مطابق منہدم کی گئی جائیدادوں کی مالیت ایک کروڑ روپے سے زائد بتائی جا رہی ہے۔
حکام نے کہا کہ یہ کارروائی حکومت کے اس عزم کی عکاسی کرتی ہے جس کے تحت منشیات کی لعنت کے خاتمے اور منشیات سے متعلق جرائم میں ملوث عناصر کے خلاف سخت کارروائی جاری رکھی جائے گی۔
دریں اثنا جاری ’’نشہ مُکت ابھیان‘‘ کے تحت ایک اہم کارروائی میں ضلع کولگام پولیس نے محکمہ مال کے اشتراک سے قاضی گنڈ کے چوگام علاقے میں مبینہ طور پر منشیات فروشی میں ملوث ایک شخص کے قبضے سے تقریباً ایک کنال سرکاری اراضی واگزار کرائی۔
حکام نے بتایا کہ یہ کارروائی پرتاپ پورہ چوگام میں انجام دی گئی، جہاں پولیس اور سول انتظامیہ کی مشترکہ جانچ کے دوران یہ ثابت ہوا کہ سروے نمبر۲۷۴کے تحت آنے والی سرکاری زمین پر غیر قانونی قبضہ کیا گیا تھا۔ بعد ازاں متعلقہ افسران کی موجودگی میں زمین کو محکمہ مال کی تحویل میں واپس دے دیا گیا۔
ملزم کی شناخت چوگام کے فیاض احمد بٹ کے طور پر کی گئی ہے، جو پولیس اسٹیشن قاضی گنڈ میں این ڈی پی ایس ایکٹ کے تحت درج ایک مقدمے میں ملوث بتایا جاتا ہے۔ حکام کے مطابق زمین واگزاری کی یہ کارروائی ضلع میں منشیات کی اسمگلنگ سے جڑے مالی اور لاجسٹک نیٹ ورک کو توڑنے کے لیے شروع کی گئی مہم کا حصہ ہے۔
انتظامیہ کی جانب سے جاری نوٹس میں واگزار کی گئی جائیداد کو سرکاری اراضی قرار دیتے ہوئے عوام کو خبردار کیا گیا ہے کہ زمین پر دوبارہ قبضہ، منتقلی یا غیر قانونی استعمال کی کسی بھی کوشش پر قانونی کارروائی عمل میں لائی جائے گی۔
سینئر سپرنٹنڈنٹ آف پولیس (ایس ایس پی) کولگام، انایت علی چودھری (آئی پی ایس) نے کہا کہ ضلع پولیس منشیات کی اسمگلنگ اور اس سے جڑی تمام غیر قانونی سرگرمیوں کے خلاف زیرو ٹالرنس پالیسی پر عمل پیرا ہے۔ انہوں نے کہا کہ پولیس نہ صرف مقدمات درج کر رہی ہے اور منشیات فروشوں کو گرفتار کر رہی ہے بلکہ غیر قانونی ذرائع سے حاصل یا قبضہ کی گئی جائیدادوں اور اثاثوں کی بھی نشاندہی کی جا رہی ہے۔
چودھری نے مزید کہا کہ ایسے اقدامات کا مقصد منشیات کے نیٹ ورک کی کمر توڑنا اور نوجوان نسل کو منشیات کی بڑھتی لعنت سے محفوظ رکھنا ہے۔
ایس ایس پی نے عوام سے بھی اپیل کی کہ وہ منشیات فروشی اور دیگر سماج دشمن سرگرمیوں سے متعلق معلومات فراہم کر کے قانون نافذ کرنے والے اداروں کے ساتھ تعاون کریں۔
