بی جے پی اور کانگریس میں فرق؟

                نہیں سمجھ رہے ہیں ‘آپ اب بھی نہیں سمجھ رہے ہیں کہ بی جے پی اور کانگریس میں کیا فرق ہے…….اگر آپ واقعی میں نہیں سمجھ رہے ہیں تواللہ میاں کی قسم ہماری سمجھ میں آپ کی سمجھ بڑی نا سمجھ ہے ۔اس سے زیادہ ہم کچھ نہیں کہہ سکتے ہیں ……. بالکل بھی نہیں کہہ سکتے ہیں ۔اور اس لئے نہیں کہہ سکتے ہیں کہ یہ کوئی راکٹ سائنس نہیں ہے ‘ بی جے پی اور کانگریس میں فرق کو سمجھنا کوئی راکٹ سائنس نہیں ہے ……. پھر بھی اگر آپ اتنی  چھوٹی سی بات نہیں سمجھ رہے ہیں تو چلئے ہم سمجھاتے ہیں ۔حالیہ اسمبلی الیکشن میں بی جے پی نے دو ریاستوں میں دو تہائی اکثریت حاصل کی ……. دو ریاستوں آسام او ر مغربی بنگال میں کی ……. آسام میں ہیمنت سرما ۱۲ مئی کو وزیرا علیٰ کے عہدے کا حلف لیں گےاور مغر بی بنگال میں سوندوادھیکاری نے ہفتہ کی صبح حلف لیا ۔ دونوں ریاستوں میں وزیر اعلیٰ کے حوالے سے کوئی کنفیوژن نہیں ‘ کوئی انتشار نہیں ‘ کوئی غیر یقینی صورتحال نہیں ‘ کوئی آپسی سرپھٹول نہیں ‘ ایک انار اور دس بیمار والا معاملہ بھی نہیں ……. مودی جی اور ان کے امیت بھائی شاہ فیصلہ لیتے ہیں کہ کو وزیر اعلیٰ ہو گا اور یہی حرف آخر ہو تا ہے …….مدت ‘ پانچ سالہ مدت کیلئے حرف آخر ہو تا ہے ……. ان پانچ برسوں میں کوئی سر اٹھا کے وزیر اعلیٰ بننے کی دعویداری پیش نہیں کرتا ہے ……. بالکل بھی نہیں کرتا ہے ……. کسی بھی ریاست ‘ جہاں بی جے پی کی حکومت ہے……. اگرچہ اب تقریباً سبھی ریاستوں میں اسی کی حکومت ہے‘ وزیر اعلیٰ کے حوالے سے کوئی ٹکراؤ‘ کوئی مسئلہ نہیں ہوتا ہے …….اب آئے کانگریس کی بات کریں ……. کانگریس نے حالیہ الیکشن میں کیرالم میں کامیابی حاصل کی …….مدتوں کے بعد اسے وہاں حکومت بنانے کا موقع ملا ……. لیکن یہاں بھی وہی مسئلہ جو کرناٹک میں ہے‘ جو راجستھان میں تھا ‘ جو کسی زمانے میں مدھیہ پردیش میں تھا‘پنجاب میں تھا ……. نتائج آنے کے ۵ دن بعد بھی کانگریس یہ فیصلہ نہیں کر پا رہی ہے کہ کیرالم کا وزیر اعلیٰ کون ہو گا کہ …….کہ اس کو معلوم ہے اور اچھی طرح معلوم ہے کہ اگر اس نے کسی ایک کونامزد کیا تو دوسرا اور ممکن ہے تیسرا ناراض ہو جائےگا ……. اس لئے اب کانگریس اس مشکل میں ہے کہ وہ کرے تو کیا کرے کہ ……. کہ کہیں ایسا نہ ہو کہ ……. کہ سرمنڈھاتے ہی اولے نہ پڑ یں اور ممکن ہے کہ ایسا ہو اور اس لئے ہو کہ……. کہ بی جے پی اور کانگریس میں یہی ایک فرق تو ہے …….یہ فرق کہ کانگریس میں کوئی مودی ہے اور نہ امیت بھائی شاہ ہے ۔ ہے نا؟