سرینگر؍۲۸؍اپریل
لداخ میں پانچ نئے اضلاع کی تشکیل کے محض ایک دن بعد، لیفٹیننٹ گورنر ونے کمار سکسینہ نے منگل کے روز ان اضلاع میں ڈپٹی کمشنرز (ڈی سی) اور سپرنٹنڈنٹ آف پولیس (ایس پی) کی تقرری کو منظوری دے دی۔ یہ اقدام انتظامی امور کو فوری طور پر شروع کرنے کے پیشِ نظر اٹھایا گیا ہے۔
نوبرا، شام، چانگتھانگ، زنسکار، اور دراس کے اضافے کے بعد لداخ میں اضلاع کی کل تعداد دو سے بڑھ کر سات ہو گئی ہے۔ اس فوری کارروائی کے ساتھ ہی تمام پانچوں نئے اضلاع میں ڈی سی اور ایس پی کے عہدے پُر کر دیے گئے ہیں۔
چانگ تھانگ کے ڈپٹی کمشنر کے طور پر نتیش راجوریا کو تعینات کیا گیا ہے جبکہ ایس زیڈ عباس جعفری وہاں کے پولیس سپرنٹنڈنٹ ہوں گے۔ مکل بینی وال نوبرا کے ڈپٹی کمشنر کے طور پر کام کریں گے جبکہ ستانزن لوسال کو وہاں کا پولیس سپرنٹنڈنٹ مقرر کیا گیا ہے۔ زنسکار میں اونکار راجندر گنڈگے کو ڈپٹی کمشنر اور رگزن سینڈوپ کو پولیس سپرنٹنڈنٹ مقرر کیا گیا ہے۔ کنزیس آنگمو ضلع شام کی ڈپٹی کمشنر کا عہدہ سنبھالیں گی اور اعجاز ملک وہاں کے پولیس سپرنٹنڈنٹ ہوں گے۔ ضلع دراس کے لیے امتیاز کاچو کو ڈپٹی کمشنر جبکہ اشتیاق احمد کو پولیس سپرنٹنڈنٹ مقرر کیا گیا ہے۔
لداخ انتظامیہ نے پریس ریلیز جاری کر کے کہا ہے کہ نئے ڈی سی اور ایس پی کی تقرری کا مقصد انتظامی ڈھانچے کو فوری طور پر فعال کرنا، امن و امان کو مستحکم کرنا اور نظم و نسق کو عوام کے قریب لانا ہے۔
لیفٹیننٹ گورنر نے نو منتخب افسران کو ہدایت دی ہے کہ وہ بغیر کسی تاخیر کے اپنے اپنے اضلاع کا چارج سنبھالیں۔ انہوں نے افسران سے عوامی توقعات پر پورا اترنے اور اضلاع کی ہمہ جہت ترقی کے لیے پوری محنت اور لگن سے کام کرنے کی اپیل کی۔
سکسینہ نے کہا کہ ہموار اور مؤثر کام کاج کو یقینی بنانے کے لیے لاجسٹک ضروریات کو پورا کرنے کے ساتھ ساتھ دیگر ماتحت افسران کے باقی عہدوں کو بھی ترجیحی بنیادوں پر پُر کیا جائے گا۔
