سرینگر؍۲۸؍اپریل
دہلی ہائی کورٹ نے بارہمولہ کے رکنِ پارلیمان انجینئررشید کو اپنے شدید علیل والد سے ملاقات کی اجازت دینے کے لیے عبوری رہائی منظور کر لی۔
عوامی اتحار پارٹی کے مرکزی ترجمان‘انعام النبی نے کہا کہ عدالت کا یہ حکم قانون اور انسانیت کے درمیان توازن کی عکاسی کرتا ہے اور اسے ’بروقت اور حساس اقدام‘ قرار دیا، جو عدلیہ پر عوامی اعتماد کو مضبوط بناتا ہے۔
نبی نے کہا کہ اس فیصلے سے نہ صرف رکنِ پارلیمان کے اہلِ خانہ کو راحت ملی ہے بلکہ اس معاملے پر نظر رکھنے والوں کو بھی سکون حاصل ہوا ہے، اور یہ کہ’’عدالتی دانائی اس بات کو یقینی بناتی ہے کہ ضابطۂ کار کی سختی میں انسانیت کہیں کھو نہ جائے‘‘۔
ترجمان نے مزید کہا کہ یہ فیصلہ اس یقین کو مضبوط کرتا ہے کہ عدالتیں صرف قانون کی تشریح کرنے والے ادارے نہیں بلکہ انسانی اقدار اور وقار کی محافظ بھی ہیں۔
نبی نے کہا کہ ایک منتخب نمائندے کو اپنے بیمار والد سے ملنے کی اجازت دینا انصاف کے ہمدردانہ پہلو کو اجاگر کرتا ہے اور یہ اس بات کی یاد دہانی ہے کہ جمہوری اداروں کو انسانی تکالیف کے حوالے سے حساس رہنا چاہیے۔
انہوں نے پارٹی کے مؤقف کو دہراتے ہوئے کہا کہ ہمدردی کو حکمرانی اور انصاف کی فراہمی کا لازمی حصہ رہنا چاہیے، اور یہ امید ظاہر کی کہ آئندہ قانونی عمل میں بھی انصاف اور شفافیت برقرار رہے گی۔
