گوتم اڈانی ایشیا کے سب سے امیر کاروباری

نئی دہلی، 17 اپریل (یو این آئی) گوتم اڈانی ایک بار پھر مکیش امبانی کو پیچھے چھوڑ کر ایشیا کے سب سے امیر انسان بن گئے ہیں
بلومبرگ کے دنیا کے 500 امیر ترین ارب پتیوں کے روزانہ کے انڈیکس میں مسٹر اڈانی کے اثاثوں کی مجموعی مالیت 92.6 ارب ڈالر بتائی گئی ہے۔ گزشتہ فہرست کے مقابلے ان کی دولت میں 3.56 ارب ڈالر کا اضافہ ہوا ہے، جس کی بدولت وہ عالمی درجہ بندی میں 19 ویں نمبر پر پہنچ گئے ہیں۔ اس کامیابی کے ساتھ ہی وہ ایشیا کے سب سے دولت مند کاروباری کا اعزاز بھی حاصل کر چکے ہیں۔
مسٹر اڈانی نے ریلائنس انڈسٹریز کے چیئرمین اور منیجنگ ڈائریکٹر مکیش امبانی کو پیچھے چھوڑ کر یہ مقام حاصل کیا ہے۔ گزشتہ فہرست کے بعد مسٹر امبانی کے اثاثوں میں 7.67 کروڑ ڈالر کا اضافہ ہوا اور ان کی دولت 90.8 ارب ڈالر تک پہنچ گئی ہے، وہ اب عالمی فہرست میں 20 ویں نمبر پر ہیں۔
اڈانی کے اثاثوں میں یہ اچھال ان کے گروپ کے شیئرز میں مسلسل آنے والی تیزی کی وجہ سے ہوا ہے۔ ان کا کاروبار بندرگاہوں سے لے کر توانائی تک پھیلا ہوا ہے، اور حالیہ دنوں میں ان شعبوں میں سرمایہ کاروں کی دلچسپی کافی بڑھی ہے۔ اسی وجہ سے ان کی کمپنیوں کی مارکیٹ ویلیو تیزی سے بڑھی اور ان کی مجموعی دولت میں بھی بڑا اضافہ ہوا۔
اس فہرست میں پہلے آٹھ مقامات پر امریکہ کا قبضہ ہے اور یہ تمام ٹیکنالوجی کمپنیاں ہیں۔ معروف صنعت کار ایلون مسک 656 ارب ڈالر کے ساتھ پہلے نمبر پر براجمان ہیں۔ ان کے بعد بالترتیب لیری پیج، جیف بیزوس، سرگئی برن اور مارک زکربرگ شامل ہیں۔
دنیا کے ٹاپ 20 امیر ترین افراد میں امریکہ کے علاوہ ہندوستان کے دو اور فرانس، میکسیکو اور اسپین کا ایک ایک کاروباری شامل ہے۔