راجستھان رائلز کے مینیجر رومی بھنڈر کو موبائل فون کے استعمال پر کلین چٹ، معمولی جرمانہ عائد

ممبئی، 17 اپریل (یو این آئی): راجستھان رائلز کے مینیجر رومی بھنڈر کو ڈگ آؤٹ کے قریب موبائل فون استعمال کرنے کے معاملے میں کسی بھی بڑی بدعنوانی کے الزام سے بری کر دیا گیا ہے۔ تاہم، بی سی سی آئی کے اینٹی کرپشن اینڈ سیکیورٹی یونٹ (اے سی ایس یو) نے اسے پہلی بار کی غلطی قرار دیتے ہوئے ان پر ایک لاکھ روپے کا علامتی جرمانہ عائد کیا ہے اور وارننگ جاری کی ہے۔
‘کرک بز’ کی رپورٹ کے مطابق، 16 اپریل کو یہ واضح کیا گیا کہ بھنڈر کے خلاف کوئی سخت تادیبی کارروائی نہیں کی جائے گی۔ اینٹی کرپشن یونٹ نے شوکاز نوٹس اور تحقیقات کے بعد پایا کہ اگرچہ بھنڈر نے ڈگ آؤٹ کے قریب فون استعمال کر کے ضوابط کی خلاف ورزی کی، لیکن ان کی نیت بدعنوانی پر مبنی نہیں تھی۔ رومی بھنڈر، جو آئی پی ایل کے پہلے سیزن سے اس لیگ سے وابستہ ہیں، کے طویل تجربے اور صاف ریکارڈ کو مدنظر رکھتے ہوئے یونٹ نے نرم رویہ اختیار کیا۔
اینٹی کرپشن اور پی ایم او اے قوانین کے تحت کھلاڑیوں اور میچ آفیشلز کے مخصوص علاقے میں موبائل فون کا استعمال سختی سے ممنوع ہے۔ اگرچہ ٹیم مینیجرز کو فون رکھنے کی اجازت ہوتی ہے، لیکن وہ اسے صرف ڈریسنگ روم کے اندر ہی استعمال کر سکتے ہیں۔