(ویب ڈیسک)
سرینگر؍۱۷؍اپریل
محکمہ موسمیات کے مطابق وادی کشمیر میں گزشتہ۲۴گھنٹوں کے دوران ہلکی بارش ریکارڈ کی گئی ہے، جبکہ اتوار تک مختلف مقامات پر وقفے وقفے سے بارش اور گرج چمک کا سلسلہ جاری رہنے کی پیش گوئی کی گئی ہے۔
اعداد و شمار کے مطابق گرمائی دارالحکومت سرینگر میں اس دوران۲ء۶ملی میٹر بارش ریکارڈ کی گئی۔ دیگر علاقوں میں قاضی گنڈ میں۴ء۴ملی میٹر، کپواڑہ میں۶ملی میٹر جبکہ گلمرگ میں۷ملی میٹر بارش ہوئی، جو وادی کے نسبتاً زیادہ بارش والے مقامات میں شامل رہا۔
جنوبی کشمیر کے سیاحتی مقام پہلگام میں۵ء۴ ملی میٹر بارش ریکارڈ کی گئی۔ادھر وادی کے بیشتر علاقوں میں رات کے درجہ حرارت معمول سے۰سے۳ڈگری سیلسیس زیادہ رہے، جبکہ کم سے کم درجہ حرارت گلمرگ میں۳ء۶ڈگری سیلسیس ریکارڈ کیا گیا۔
محکمہ موسمیات کے مطابق۱۹ ؍اپریل تک وادی میں مطلع جزوی طور پر ابر آلود رہنے اور مختلف مقامات پر ہلکی بارش یا گرج چمک کے ساتھ بارش کا امکان ہے۔ یہ موسمی سرگرمیاں زیادہ تر صبح اور شام یا دیر شام کے اوقات میں متوقع ہیں۔
اسی دوران۴۰ سے۵۰ کلومیٹر فی گھنٹہ کی رفتار سے تیز ہوائیں چلنے اور چند مقامات پر ژالہ باری کا بھی امکان ظاہر کیا گیا ہے۔
۲۰سے۲۴؍ اپریل کے دوران موسم میں بہتری آنے اور عمومی طور پر خشک موسم رہنے کی توقع ہے، جبکہ۲۵ ؍اور۲۶؍ اپریل کو بھی خشک موسم برقرار رہ سکتا ہے۔ تاہم کچھ مقامات پر دوپہر کے وقت ہلکی بارش یا گرج چمک کے ساتھ تیز ہواؤں کا امکان موجود ہے۔
اس دوران رازدان ٹاپ پر تازہ برفباری کے بعد جمعہ کو۸۵کلومیٹر طویل بانڈی پورہ گریز سڑک کو بند کر دیا گیا، حکام نے بتایا۔
ایک عہدیدار کے مطابق بانڈی پورہ کو دور افتادہ وادی گریز سے ملانے والی اس اہم شاہراہ پر برفباری کے باعث راستہ پھسلن زدہ اور غیر محفوظ ہو گیا، جس کے پیش نظر احتیاطی طور پر ٹریفک معطل کر دی گئی۔
سب ڈویژنل مجسٹریٹ (ایس ڈی ایم)گریز ‘مختار احمد نے کہا کہ سڑک اگلے احکامات تک بند رہے گی۔انہوں نے کہا’’بانڈی پورہ گریز سڑک پر آمد و رفت آئندہ احکامات تک معطل رہے گی‘‘۔
حکام کے مطابق درے پر برفباری کے باعث حد نگاہ کم ہو گئی اور سڑک پھسلن زدہ ہو گئی، جس کے نتیجے میں ٹریفک روکنے کا فیصلہ کیا گیا۔
انتظامیہ نے ایک ایڈوائزری جاری کرتے ہوئے مقامی لوگوں اور مسافروں سے غیر ضروری سفر سے گریز کرنے اور سڑک کے محفوظ قرار دیے جانے تک سرکاری ہدایات پر عمل کرنے کی اپیل کی ہے۔
