ایجنسیز
جموں؍۴؍ اپریل
نائب وزیر اعلیٰ سریندر چوہدری نے ہفتہ کے روز کہا کہ جموں و کشمیر میں دہشت گردی کے لیے کوئی جگہ نہیں، تاہم کسی بھی صورت میں بے گناہ افراد کو نقصان نہیں پہنچنا چاہیے۔
اسمبلی کے باہر نامہ نگاروں سے بات کرتے ہوئے نائب وزیر اعلیٰ نے کہا کہ گاندربل واقعہ کی تحقیقات کے احکامات پہلے ہی لیفٹیننٹ گورنر کی جانب سے جاری کیے جا چکے ہیں اور حکومت اس کی رپورٹ کی بنیاد پر کارروائی کرے گی۔
چودھری نے کہا’’جموں و کشمیر تین دہائیوں سے دہشت گردی کا سامنا کر رہا ہے۔ دہشت گردوں کی یہاں یا ملک کے کسی بھی حصے میں کوئی جگہ نہیں ہے۔ اسی کے ساتھ یہ بھی ضروری ہے کہ کوئی بے گناہ شخص ہلاک نہ ہو۔ تحقیقات کی رپورٹ کا انتظار کیا جائے‘‘۔
نائب وزیر اعلیٰ نے خبردار کیا کہ اگر گاندربل انکاؤنٹر فرضی ثابت ہوا تو سخت کارروائی کی جائے گی اور اس بات پر زور دیا کہ ایسے واقعات دوبارہ نہیں ہونے چاہئیں۔
چودھری نے اپوزیشن کی جانب سے نیشنل کانفرنس کے وعدوں پر تنقید کا بھی جواب دیتے ہوئے کہا کہ حکومت عوام کے سامنے جوابدہ ہے۔
نائب وزیر اعلیٰ نے کہا’’ہم اپوزیشن کے اشاروں پر کام نہیں کر رہے۔ عمر عبداللہ کی قیادت والی حکومت عوام کی حکومت ہے۔ ہم اپنے کیے گئے وعدوں کو پورا کرنے کے لیے یہاں ہیں۔ اپوزیشن کو چاہیے کہ وہ اپنے وعدوں کا حساب دے۔‘‘
