ایجنسیز
سری نگر/۴؍اپریل
جموں و کشمیر کے لیفٹیننٹ گورنر‘ منوج سنہا نے آئی پی ایس افسر سنجیو کمار کھجوریا کو مبینہ مالی بے ضابطگیوں کی تحقیقات کے پیش نظر فوری طور پر معطل کر دیا ہے۔
ایک سرکاری حکم نامےکے مطابق، کھجوریا جو جے کے اے پی ۴سیکیورٹی بٹالین کے کمانڈنٹ کے طور پر تعینات تھے اور ساتھ ہی فرسٹ بارڈر بٹالین جموں کا اضافی چارج بھی سنبھال رہے تھے، ان پر جنرل پروویڈنٹ (جی پی) فنڈز میں خرد برد اور جے کے اے پی۴سیکیورٹی بٹالین کے اہلکاروں کے انکم ٹیکس کٹوتیوں میں بے ضابطگیوں کے الزامات ہیں۔
حکم نامے کے مطابق معطلی کے دوران مذکورہ افسر کو پولیس ہیڈکوارٹرز جموں و کشمیر کے ساتھ منسلک رکھا جائے گا۔
سرکاری ذرائع کے مطابق مبینہ مالی بے ضابطگیوں کی نوعیت اور حجم کا تعین کرنے اور ذمہ داری طے کرنے کے لیے تحقیقات شروع کر دی گئی ہے۔ تحقیقات کی رپورٹ کی بنیاد پر آئندہ کارروائی عمل میں لائی جائے گی
