عالمی مارکیٹ میں تیل کی قیمتوں کا بحران: کورین ایئر لائن کا ‘ایمرجنسی موڈ’ نافذ کرنے کا فیصلہ

سیئول،31 مارچ (یواین آئی )عالمی سطح پر تیل کی قیمتوں میں مسلسل اضافے اور ایران امریکا کشیدگی کے باعث پیدا ہونے والے بحران نے ہوائی کمپنیوں کے لیے خطرے کی گھنٹی بجا دی ہے۔ جنوبی کوریا کی سب سے بڑی فضائی کمپنی ‘کورین ایئر’ نے کل سے ملک بھر اور بین الاقوامی آپریشنز کے لیے ‘ایمرجنسی مینجمنٹ موڈ’ فعال کرنے کا اعلان کیا ہے۔
کورین ایئر کے ترجمان نے میڈیا کو بریفنگ دیتے ہوئے بتایا کہ کسی بھی ایئر لائن کے کل آپریٹنگ اخراجات کا 30 فیصد ایندھن پر مشتمل ہوتا ہے۔ ترجمان کا کہنا تھا”اگر تیل کی قیمتیں موجودہ بلند ترین سطح پر برقرار رہیں تو ایندھن کے اخراجات کی یہ شرح 60 فیصد تک پہنچ سکتی ہے، جو کہ کسی بھی فضائی کمپنی کے لیے ناقابلِ برداشت بوجھ ہو گا۔
فضائی کمپنی نے غیر معمولی صورتحال سے نمٹنے کے لیے یکم اپریل سے کمپنی کے انتظامی ڈھانچے میں ‘ایمرجنسی مینجمنٹ موڈ’ نافذ کر دیا جائے گا۔ کمپنی فضائی آپریشنز کے غیر ضروری اخراجات کو کم کرنے کے لیے تمام ممکنہ اقدامات کر رہی ہے۔ ضرورت پڑنے پر پروازوں کے موجودہ شیڈول میں تبدیلی یا غیر منافع بخش روٹس کی معطلی پر غور کیا جا رہا ہے۔