سرینگر سڑک حادثے میں موٹر بائیک سوار ہلاک‘ اہلیہ زخمی

سرینگر //
سرینگر کے مضافاتی علاقہ احمد نگر میں الخدام کے نزدیک ہفتے کی صبح ایک سڑک حادثے میں ایک شخص کی موت جبکہ اس کی اہلیہ شدید زخمی ہوگئی۔
تفصیلات کے مطابق سرینگر کے احمد نگر علاقے میں الخدام کے نزدیک ہفتے کی صبح ایک سڑک حادثے میں ایک۵۸سالہ شخص اور اس کی۵۵سالہ اہلیہ شدید زخمی ہوگئے ۔
دونوں کو مقامی لوگوں نے علاج و معالجے کیلئے شیر کشمیر انسٹی ٹیوٹ آف میڈیکل سائنسز صورہ منتقل کیا لیکن مذکورہ شخص راستے میں ہی زخموں کی تاب نہ لا کر دم توڑ گیا۔
متوفی کی شناخت فاروق احمد وانی ساکن الٰہی باغ سرینگر کے بطور ہوئی ہے جبکہ اس کی اہلیہ کی شناخت نسیمہ بانو کے بطور ہوئی ہے ۔بتایا جاتا ہے کہ نسمیہ کی حالت ہسپتال میں نازک بنی ہوئی ہے ۔
دریں اثنا پولیس نے اس ضمن میں ایک کیس درج کرکے قانونی کارروائیاں شروع کی ہیں۔
اس دوران جنوبی کشمیر کے ضلع پلوامہ کے اونتی پورہ علاقے میں گوری پورہ کراسنگ کے نزدیک ہفتے کے روز سڑک حادثے میں کم سے کم سات سی آر پی ایف اہلکار زخمی ہوگئے ۔
ذرائع نے بتایا کہ اونتی پورہ میں گوری پورہ کراسنگ کے نزدیک سرینگر، جموں قومی شاہراہ پر ہفتے کے روز سی آر پی ایف کی۱۳۰ویں بٹالین کی ایک اور ایک ٹرک درمیان ٹکر ہوگئی جس کے نتیجے میں کم سے کم سات اہلکار زخمی ہوگئے ۔
زخمی اہلکاروں کو علاج و معالجے کے لئے پرائمری ہیلتھ سینٹر اونتی پورہ پہنچایا گیا جہاں دو زخمیوں کو ڈاکٹروں نے سری نگر ریفر کیا۔
زخمی اہلکاروں کی شناخت ہیڈ کانسٹیبل نریش کمار، ہیڈ کانسٹیبل پنکج پرساد، ہیڈ کانسٹیبل پونم چند، کانسٹیبل اوگے موگے بال چندرا، ہیڈ کانسٹیبل بادی پاٹل، ہیڈ کانسٹیبل ہیمنشو ہلدار اور سریش کمار کے بطور ہوئی ہے ۔
دریں اثنا پولیس نے اس ضمن میں ایک کیس درج کرکے تحقیقات شروع کی ہیں۔