بی جے پی کا ممتا پر انتخابی عمل متاثر کرنے اور ووٹروں کو دھمکانے کا الزام، کمیشن سے شکایت

نئی دہلی، 30 مارچ (یواین آئی) بھارتیہ جنتا پارٹی (بی جے پی) نے پیر کو الیکشن کمیشن سے مغربی بنگال کی وزیر اعلیٰ ممتا بنرجی پر انتخابی عمل کو متاثر کرنے اور ووٹروں کو دھمکانے کا الزام لگایا ہے۔
اس معاملے میں مرکزی وزراء پیوش گوئل اور کرن ریجیجو کی قیادت میں بی جے پی کے ایک وفد نے الیکشن کمیشن پہنچ کر باضابطہ شکایت درج کرائی۔ بی جے پی کے اس وفد میں مرکزی وزراء پیوش گوئل، کرن ریجیجو اور سوکانت مجمدار کے ساتھ ساتھ انل بلونی اور پارٹی کے کئی دیگر رہنما شامل تھے۔ رہنماؤں نے کمیشن کو ایک یادداشت پیش کی جس میں ریاست میں آزادانہ اور منصفانہ انتخابات کرانے کا مطالبہ کیا گیا۔
مسٹر ریجیجو نے میڈیا سے بات کرتے ہوئے وزیر اعلیٰ ممتا بنرجی پر لوگوں کے گھروں میں جا کر انہیں دھمکانے کا الزام لگایا۔ انہوں نے کہا کہ ترنمول کانگریس نے انتظامیہ اور پولیس کی مدد سے پورے انتخاب کو "ہائی جیک” کر لیا ہے۔ بی جے پی رہنماؤں کا دعویٰ ہے کہ گزشتہ انتخابات میں بھی حکمراں جماعت نے دباؤ اور غنڈہ گردی کے ذریعے جیت حاصل کی تھی۔ انہوں نے کہا کہ جمہوریت میں ووٹ دینا ہر شہری کا حق ہے اور اسے کسی بھی طرح متاثر نہیں کیا جانا چاہیے۔
بی جے پی نے الیکشن کمیشن سے اپیل کی کہ وہ مغربی بنگال کی انتظامیہ اور پولیس کے نظام کو اپنے کنٹرول میں لے کر شفاف انتخابات کو یقینی بنائے۔ دوسری جانب، بی جے پی کا یہ بھی دعویٰ ہے کہ ریاست میں عوام ترنمول کانگریس کے خلاف ہیں اور اسی وجہ سے حکمراں جماعت گھبرا کر انتخابی عمل کو متاثر کرنے کی کوشش کر رہی ہے۔ الیکشن کمیشن نے بی جے پی وفد کو یقین دلایا ہے کہ منصفانہ اور پرامن انتخابات کرانے کے لیے تمام ضروری اقدامات کیے جائیں گے۔
`