کولکتہ نائٹ رائیڈرز کا تاریخی اعزاز: آندرے رسیل کی جرسی نمبر 12 ہمیشہ کے لیے ریٹائر

کولکتہ25 مارچ(یو این آئی )انڈین پریمیئر لیگ کی معروف فرنچائز کولکتہ نائٹ رائیڈرز ( کے کے آ ر) نے اپنے مایہ ناز سابق آل راؤنڈر آندرے رسل کی بے مثال خدمات کے اعتراف میں ان کی مخصوص جرسی نمبر 12 کو ریٹائر کرنے کا بڑا اعلان کیا ہے۔ اس فیصلے کے بعد اب مستقبل میں کے کے آر کا کوئی بھی کھلاڑی یہ نمبر زیب تن نہیں کر سکے گا۔
آندرے رسل نے 2014 سے 2025 تک (سوائے 2017 کے) نائٹ رائیڈرز فیملی کے ساتھ ایک طویل اور کامیاب سفر طے کیا۔ انہوں نے اپنے مجموعی 140 آئی پی ایل میچوں میں سے 133 مقابلے صرف کولکتہ نائٹ رائیڈرز کی جانب سے کھیلے، جو ان کی ٹیم کے ساتھ گہری وابستگی کا ثبوت ہے۔
رسیل کے کے آر کی ان دونوں ٹیموں کا حصہ رہے جنہوں نے 2014 اور 2024 میں آئی پی ایل کا ٹائٹل جیتا۔ خاص طور پر 2024 کا سیزن ان کے کیریئر کا یادگار ترین سال ثابت ہوا، جہاں انہوں نے 15 میچوں میں 185 کے برق رفتار اسٹرائیک ریٹ سے 222 رنز بنائے اور 19 اہم وکٹیں حاصل کر کے ٹیم کو دوسری بار چیمپئن بنانے میں کلیدی کردار ادا کیا۔
گزشتہ سال نومبر میں آئی پی ایل سے ریٹائرمنٹ کے بعد، رسیل نے اب کے کے آر میں بطور پاور کوچ اپنی نئی اننگز کا آغاز کر دیا ہے۔ اپنی نئی ذمہ داری پر بات کرتے ہوئے ان کا کہنا تھا
میرا ذہن اب بھی وہی ہے، فرق صرف اتنا ہے کہ اب میں ان کھلاڑیوں کو وہ سب واپس دینا چاہتا ہوں جو میں نے برسوں میں سیکھا ہے۔ مجھے اس نئے (رول) میں بے حد خوشی محسوس ہو رہی ہے۔
آئی پی ایل کے علاوہ، رسیل نائٹ رائیڈرز کی دیگر عالمی ٹیموں جیسے ‘ابو ظہبی نائٹ رائیڈرز’ (ائی ایل ٹی20 ) اورٹرنباگو نائٹ رائیڈرز’ (سی پی ایل) کی بھی چار چار سیزن تک نمائندگی کر چکے ہیں، جس کی وجہ سے وہ فرنچائز کے عالمی برانڈ ایمبیسڈر بن کر ابھرے ہیں۔
کھیلوں کی دنیا میں جرسی نمبر ریٹائر کرنا کسی بھی کھلاڑی کے لیے سب سے بڑا اعزاز تسلیم کیا جاتا ہے اور آندرے رسیل اب سچن تیندو لکر اور ایم ایس دھونی جیسے لیجنڈز کی فہرست میں شامل ہو گئے ۔