آئی پی ایل 2026: پیٹ کمنز کی عدم دستیابی، ایشان کشن سن رائزرز حیدرآباد کے کپتان نامزد

حیدرآباد ،18 مارچ (یو این آئی ) انڈین پریمیئر لیگ (آئی پی ایل) 2026 کے آغاز سے قبل سن رائزرز حیدرآباد (ایس آر ایچ) نے اسٹار وکٹ کیپر بلے باز ایشان کشن کو پیٹ کمنز کی غیر موجودگی میں ٹیم کا نیا کپتان مقرر کر دیا ہے۔ آسٹریلیائی فاسٹ بالر پیٹ کمنز کمر کی تکلیف کے باعث ابتدائی چند میچوں کے لیے دستیاب نہیں ہوں گے۔
فرنچائز کے مطابق پیٹ کمنز ابھی تک اپنی انجری سے مکمل طور پر صحت یاب نہیں ہو سکے ہیں، جس کی وجہ سے ان کی شرکت پر شکوک و شبہات برقرار ہیں۔ ایشان کشن کی قیادت میں نوجوان آل راؤنڈر ابھیشک شرما نائب کپتان کی ذمہ داریاں نبھائیں گے۔
ایشان کشن کو یہ ذمہ داری ان کی شاندار فارم اور قائدانہ صلاحیتوں کی بنیاد پر دی گئی ہے۔
انہوں نے حال ہی میں اپنی کپتانی میں جھارکھنڈ کو پہلی بار سید مشتاق علی ٹرافی کا فاتح بنایا، جہاں انہوں نے 517 رنز اسکور کیے۔
حال ہی میں اختتام پذیر ہونے والے ٹی-20 ورلڈ کپ میں ایشان کشن نے ہندوستانی ٹیم کی فتح میں کلیدی کردار ادا کیا۔ انہوں نے ٹورنامنٹ میں 207 کے اسٹرائیک ریٹ سے 532 رنز بنا کر اپنی دھاک بٹھائی۔
سن رائزرز حیدرآباد کی انتظامیہ کو امید ہے کہ ایشان کشن اپنی جارحانہ بیٹنگ اور حالیہ قائدانہ تجربے کو بروئے کار لاتے ہوئے ٹیم کو ٹورنامنٹ کے آغاز میں فتوحات دلانے میں کامیاب رہیں گے۔
ادھر کولکتہ نائٹ رائڈرز ( کے کے آر) کے تیز گیند باز ہرشیت رانا کے انڈین پریمیئر لیگ (آئی پی ایل) 2026 کے زیادہ تر میچوں سے باہر رہنے کا امکان ہے۔ ہرشیت رانا اس وقت گھٹنے کی سرجری کے بعد بحالی کے عمل سے گزر رہے ہیں، جو فروری میں ہوئی تھی۔ بی سی سی آئی کی میڈیکل ٹیم نے ابھی تک ان کی واپسی کے لیے کوئی حتمی تاریخ طے نہیں کی ہے۔ہرشیت رانا کو ٹی 20 ورلڈ کپ سے قبل جنوبی افریقہ کے خلاف ایک مشقی میچ کے دوران گھٹنے میں تکلیف ہوئی تھی۔ سرجری کے بعد وہ نیشنل کرکٹ اکیڈمی میں ری ہیب کر رہے ہیں۔ اگر وہ اس سیزن میں نہیں کھیل پاتے، تو یہ ان کے لیے دوسرا بڑا ٹورنامنٹ ہوگا جس سے وہ محروم رہیں گے۔ حال ہی میں انہیں ‘بہترین نووارد کھلاڑی’ کے ایوارڈ سے بھی نوازا گیا تھا۔کولکتہ نائٹ رائڈرز کو پہلے ہی مستفیض الرحمن کی خدمات حاصل نہیں ہیں، جنہیں بی سی سی آئی کی ہدایت پر ریلیز کر دیا گیا تھا۔ ان کے متبادل کے طور پر ٹیم نے بلیسنگ موزاربانی کو شامل کیا ہے۔ ٹیم کے پاس متیشا پتھیرانا، ویبھو اروڑہ، آکاش دیپ، عمران ملک اور کارتک تیاگی جیسے گیند باز موجود ہیں۔
کیمرون گرین اور رمن دیپ سنگھ بھی بالنگ کے آپشنز فراہم کرتے ہیں۔آئی پی ایل کے 19ویں سیزن کا آغاز 28 مارچ سے ہو رہا ہے۔ کے کے آر اپنا پہلا میچ 29 مارچ کو وانکھیڑے اسٹیڈیم میں ممبئی انڈینز کے خلاف کھیلے گی۔ جاری کردہ شیڈول کے مطابق، کولکتہ کو اپنے ہوم گراؤنڈ پر سن رائزرز حیدرآباد، پنجاب کنگز اور لکھنؤ سپر جائنٹس کا سامنا کرنا ہے۔