ایندھن بھرنے کا امریکی فوجی طیارہ کے سی -135 مغربی عراق میں گر کر تباہ

واشنگٹن، 13 مارچ (یو این آئی) مغربی عراق میں امریکی فوج کا ایندھن فراہم کرنے والا فوجی طیارہ اسٹریٹوٹینکر کے سی 135 حادثے کا شکار ہو گیا ہے۔
بی بی سی کی رپورٹ کے مطابق امریکی فوج نے تصدیق کی ہے کہ عراق میں اس کا ایک طیارہ گر کر تباہ ہو گیا ہے۔ فوج کے مطابق یہ حادثہ نہ تو دشمن کی فائرنگ کی وجہ سے اور نہ اپنی فوج کی گولی باری کے سبب پیش آیا۔
یو ایس سینٹرل کمانڈ نے بتایا کہ مغربی عراق میں امدادی اور راحت رسانی کارروائیاں جاری ہیں۔ فوج کی جانب سے جاری بیان میں کہا گیا ہے کہ اس مشن میں ایک دوسرا طیارہ بھی شامل تھا، جو بحفاظت لینڈ کر گیا۔ امریکی فوج کے مطابق ابھی تک یہ واضح نہیں کہ کے سی -135 کے گرنے کی اصل وجہ کیا تھی، تاہم امکان یہ بھی ظاہر کیا جا رہا ہے کہ یہ فضا میں کسی تصادم کے باعث حادثے کا شکار ہوا ہو۔
واضح رہے کہ کے سی -135 جیسے ایندھن بردار طیارے جنگی حالات میں جنگی طیاروں اور بمبار طیاروں کو فضا ہی میں ایندھن فراہم کرتے ہیں تاکہ وہ طویل فاصلے تک اپنے ہدف تک پہنچ سکیں۔ یہ بڑا لاجسٹک آپریشن ہوتا ہے جس میں بیک وقت میں کئی جیٹ طیارے فضا میں موجود ہوتے ہیں اور انہیں ایندھن کی ضرورت ہوتی ہے۔
ایریل ری فیولنگ کے دوران جنگی طیارے کو ٹینکر طیارے کے بہت قریب پرواز کرنا پڑتا ہے۔ اس کے بعد ٹینکر سے خاص نلکی (پروب) یا ڈروگ نکالی جاتی ہے اور پائلٹ اپنے طیارے کو اس کے ساتھ جوڑتا ہے، جس کے بعد ایندھن منتقل کیا جاتا ہے۔ اس دوران دونوں طیارے ایک دوسرے سے چند فٹ کے فاصلے پر ہوتے ہیں اور اکثر یہ کارروائی رات کے وقت انجام دی جاتی ہے۔
پائلٹ کے لیے اس پروب یا بعض صورتوں میں شٹل کاک کی شکل کے ڈروگ کے ساتھ رابطہ قائم رکھنا خاصی مہارت کا کام ہوتا ہے، خاص طور پر ایسے ماحول میں جہاں اردگرد کئی دوسرے طیارے بھی موجود ہوں۔ دشمن کی نظر سے بچنے کے لیے بعض اوقات اس مشن کے دوران طیاروں کی تمام روشنیاں بھی بند رکھی جاتی ہیں۔
امریکی سینٹرل کمانڈ نے بتایا کہ یہ حادثہ عراق میں پیش آیا ہے، تاہم یہ واضح نہیں کیا گیا کہ یہ حادثہ پڑوسی ملک ایران کی سرحد سے کتنی دور ہوا۔
عام طور پر کے سی -135 طیارے میں تین افراد پر مشتمل عملہ ہوتا ہے، جن میں ایک پائلٹ، ایک شریک پائلٹ اور ایک بوم آپریٹر شامل ہوتا ہے۔
امریکی فضائیہ کے مطابق فضائیہ کی ایئر موبلٹی کمانڈ کے بیڑے میں تقریباً 400 ٹینکر طیارے شامل ہیں۔