تہران، 11 مارچ (یو این آئی) ایران کے نئے سپریم لیڈر مجتبیٰ خامنہ ای کی اسرائیلی و امریکی حملے میں زخمی ہونے کی خبروں کی اصل حقیقت سامنے آگئی۔
ایران کے نئے سپریم لیڈر مجتبیٰ خامنہ ای کے حوالے سے گردش کرنے والی تشویشناک خبروں پر ایرانی صدر کے بیٹے اور مشیر یوسف پزشکیان نے خاموشی توڑ دی ہے۔
انہوں نے تصدیق کی ہے کہ مجتبیٰ خامنہ ای حملے میں زخمی نہیں ہوئے بلکہ وہ مکمل طور پر محفوظ اور صحت مند ہیں۔
یوسف پزشکیان نے سوشل میڈیا پلیٹ فارم انسٹاگرام پر جاری ایک پیغام میں کہا کہ "میں نے خبر سنی تھی کہ مجتبیٰ خامنہ ای زخمی ہوگئے ہیں، جس پر میں نے قریبی دوستوں اور متعلقہ حلقوں سے رابطہ کیا، مجھے بتایا گیا ہے کہ وہ خیر و عافیت سے ہیں۔”
واضح رہے کہ اس سے قبل ایران کے سرکاری ٹی وی نے اپنی ایک رپورٹ میں دعویٰ کیا تھا کہ اسرائیل اور امریکا کے حالیہ حملے میں مجتبیٰ خامنہ ای زخمی ہوئے ہیں۔
اسی دوران امریکی اخبار ‘نیویارک ٹائمز’ نے ایک رپورٹ شائع کی ہے جس میں کہا گیا ہے کہ اس حملے میں مجتبیٰ خامنہ ای تو محفوظ رہے تاہم ان کے چچا جاں بحق ہوگئے ہیں۔
تہران میں ان متضاد خبروں نے شدید ہیجان پیدا کر دیا تھا، تاہم یوسف پزشکیان کے بیان کے بعد اب صورتحال واضح ہونا شروع ہو گئی ہے۔
