ٹی-20 ورلڈ کپ کی جیت کے جشن میں ڈوبا اتر پردیش

وارانسی، 9 مارچ (یو این آئی) احمد آباد کے نریندر مودی اسٹیڈیم میں ہندوستانی ٹیم نے نیوزی لینڈ کے خلاف یکطرفہ جیت کے ساتھ مسلسل دوسری بار ٹی-20 ورلڈ کپ کا خطاب جیسے ہی اپنے نام کیا، پورے اتر پردیش میں کرکٹ شائقین خوشی سے جھوم اٹھے۔ اپنی خوشی کا اظہار ڈھول نگاڑے بجا کر اور آتش بازی کے ساتھ کیا گیا، جشن کا یہ سلسلہ آدھی رات کے بعد تک جاری رہا۔
لکھنؤ، وارانسی، پریاگ راج، بریلی، میرٹھ، کانپور سمیت پورے صوبے میں ہولی کے بعد دیوالی جیسا منظر نظر آیا۔ اس تاریخی جیت کے جشن میں مذہبی شہر کاشی آدھی رات تک خوشیوں میں ڈوبا رہا۔ کاشی ہندو یونیورسٹی (بی ایچ یو) کے سنگھ دروازے پر ہزاروں طلبہ اور کاشی کے باشندوں نے ہر طرف ترنگا لہرایا اور ڈھول نگاڑوں اور آتش بازی کے ساتھ جیت کا جشن منایا۔ گودولیا، دشاشومیَدھ، مہمور گنج، نرالا نگر، پانڈے پور، لہورابیر اور چوک سمیت شہر کے کئی علاقوں میں کرکٹ کا جنون دیکھنے کے قابل تھا۔
کینٹ کے رکن اسمبلی سوربھ سریواستو کا ہندوستانی ٹیم کی جیت کے بعد رقص کرتے ہوئے ویڈیو سوشل میڈیا پر تیزی سے وائرل ہو رہا ہے۔ پرانے لکھنؤ کے امین آباد، نخاس اور بازارکھالہ میں کرکٹ شائقین کی بھیڑ ترنگے لہراتے ہوئے سڑکوں پر نکل آئی۔ گومتی نگر، اندرا نگر، علی گنج، کپور تھلا، سروجنی نگر اور تیلی باغ سمیت پورے لکھنؤ میں آتش بازی کا سلسلہ دیر رات تک جاری رہا۔
کانپور میں بھی ٹی-20 ورلڈ کپ کی جیت کا جنون سر چڑھ کر بولا۔ صبح سے ہی صنعتی شہر کرکٹ کے بخار میں مبتلا تھا۔ ہندوستانی ٹیم کی جیت کے لیے پوجا، ہون اور دعاؤں کا سلسلہ شروع ہوا، جو دیر رات سوریہ کمار یادو کی قیادت والی ٹیم کی جیت کے ساتھ آتش بازی اور ڈھول نگاڑوں کے جشن میں تبدیل ہو گیا۔ ادھر وارانسی میں شہر کے کئی علاقوں میں بڑی اسکرینوں پر میچ کی براہِ راست نشریات دکھائی گئیں، جہاں لوگ جوش و خروش کے ساتھ میچ کا لطف اٹھاتے نظر آئے۔