ورلڈ کپ کے سیمی فائنلز اور فائنل کے ٹکٹوں کی فروخت شروع

نئی دہلی، 24 فروری (یواین آئی )
آئی سی سی مینز ٹی ٹوئنٹی ورلڈ کپ 2026 کے فیصلہ کن مرحلے کے لیے شائقین کا انتظار ختم ہو گیا ہے۔ ٹورنامنٹ کے دونوں سیمی فائنلز اور گرینڈ فائنل کے ٹکٹوں کی فروخت آج یعنی منگل کی شام 7 بجے سے شروع ہو رہی ہے۔
شائقین کرکٹ اب 4 مارچ کو ہونے والے پہلے سیمی فائنل، 5 مارچ کے دوسرے سیمی فائنل اور 8 مارچ کے فائنل کے لیے اپنی نشستیں بک کر سکتے ہیں۔ ٹکٹ خریدنے کے لیے آئی سی سی کی آفیشل ویب سائٹ پر جانا ہوگا۔
قابلِ ذکر بات یہ ہے کہ سیمی فائنل 1 اور فائنل کے مقامات کا انحصار ٹیموں کی کوالیفکیشن، خصوصاً پاکستان اور سری لنکا کی پیش قدمی پر ہے۔
پہلے سیمی فائنل اور فائنل کے لیے مقامات کا انتخاب درج ذیل شرائط کے تحت ہوگا۔
سیمی فائنل 1 (4 مارچ)اگر پاکستان کوالیفائی کرتا ہے، تو یہ میچ کولمبو (آر پریماداسا اسٹیڈیم) میں ہوگا۔
اگر پاکستان نہیں لیکن سری لنکا کوالیفائی کرتا ہے (اور اس کا مقابلہ ہندوستان سے نہیں ہے)، تب بھی یہ کولمبو میں ہوگا۔
اگر مندرجہ بالا میں سے کچھ بھی نہیں ہوتا، تو یہ میچ کولکتہ (ایڈن گارڈنز) میں کھیلا جائے گا۔
سیمی فائنل 2 (5 مارچ)
یہ میچ طے شدہ پروگرام کے مطابق ممبئی کے وانکھیڑے اسٹیڈیم میں منعقد ہوگا۔
فائنل (8 مارچ):
ورلڈ کپ کا فائنل عام حالات میں احمد آباد (نریندر مودی اسٹیڈیم) میں کھیلا جائے گا۔
تاہم، اگر پاکستان فائنل تک پہنچ جاتا ہے، تو فائنل کا مقام تبدیل کر کے کولمبو کر دیا جائے گا۔
آئی سی سی نے واضح کیا ہے کہ اگر کوئی مداح کسی ایسے مقام کے لیے ٹکٹ خریدتا ہے جہاں بالآخر میچ منعقد نہیں ہوتا (مقامات کی تبدیلی کی وجہ سے)، تو ٹکٹ ہولڈر کو مکمل رقم واپس (Refund) کر دی جائے گی۔