نئی دہلی،16 فروری (یو این آئی ) افغانستان کے کپتان اور اسٹار اسپنر راشد خان نے ٹی ٹوئنٹی کرکٹ کی تاریخ میں ایک نیا سنگِ میل عبور کر لیا ہے۔ وہ اس فارمیٹ میں 700 وکٹیں حاصل کرنے والے دنیا کے پہلے بالر بن گئے ہیں۔راشد خان نے یہ تاریخی کامیابی پیر کے روز آئی سی سی ٹی ٹوئنٹی ورلڈ کپ میں متحدہ عرب امارات (یو اے ای) کے خلاف میچ کے دوران حاصل کی۔ انہوں نے یو اے ای کے بلے باز محمد عرفان کو آؤٹ کر کے یہ اعزاز اپنے نام کیا۔اس میچ سے قبل راشد خان کے کھاتے میں 699 وکٹیں تھیں۔ اس سنگِ میل تک پہنچنے کے لیے انہیں تھوڑا انتظار کرنا پڑا
راشد خان نے اپنے پہلے 3.2 اوورز میں کوئی وکٹ حاصل نہیں کی تھی اور 20 گیندوں پر 17 رنز دیے تھے۔ یو اے ای کی اننگز کے 16ویں اوور میں محمد عرفان نے راشد کی گیند پر ریورس سویپ کھیلنے کی کوشش کی، لیکن وہ گیند کو مس کر گئے اور توازن برقرار نہ رکھ پانے کی وجہ سے ان کا پاؤں اسٹمپ سے ٹکرا گیا، جس پر انہیں ‘ہٹ وکٹ’ قرار دیا گیا۔ گزشتہ ہفتے جنوبی افریقہ کے خلاف میچ میں انہوں نے اپنی 698ویں اور 699ویں وکٹ حاصل کی تھی۔
عظمت اللہ عمرزئی کی آل راؤنڈ کارکردگی اور ابراہیم زدران کی ذمہ دارانہ نصف سنچری کی بدولت افغانستان نے ٹی ٹوئنٹی ورلڈ کپ کے ایک اہم مقابلے میں متحدہ عرب امارات کو 5 وکٹوں سے شکست دے کر پہلی کامیابی حاصل کر لی۔ 161 رنز کا ہدف افغانستان نے 4 گیندیں قبل ہی حاصل کر لیا۔افغانستان کی یو اے ای کے خلاف اس دلچسپ فتح نے جنوبی افریقہ کے لیے سپر ایٹ مرحلے کی راہ ہموار کر دی ہے۔ اس نتیجے کے بعد گروپ کی صورتحال واضح ہو گئی ہے اور جنوبی افریقہ باضابطہ طور پر اگلے مرحلے کے لیے کوالیفائی کر چکا ہے۔
افغانستان کی اننگز کا آغاز اچھا نہیں تھا اور رحمان اللہ گرباز پہلے ہی اوور میں صفر پر آؤٹ ہو گئے، تاہم بعد میں بلے بازوں نے میچ کو سنبھالا۔
ابراہیم زدران (53 رنز) نے ایک اینڈ سنبھالے رکھا اور 41 گیندوں پر 6 چوکوں اور 1 چھکے کی مدد سے اپنی نصف سنچری مکمل کی۔
عظمت اللہ عمرزئی (ناقابلِ شکست 40 رنز) نے میچ وننگ اننگز کھیلی۔ عمرزئی نے محض 21 گیندوں پر 3 چھکوں اور 2 چوکوں کی مدد سے ٹیم کو جیت کی دہلیز تک پہنچایا۔
درویش رسولی (33 رنز) نے 23 گیندوں پر تیز رفتار اننگز کھیل کر جیت میں اہم کردار ادا کیا۔یو اے ای کی جانب سے جنید صدیقی اور محمد عرفان نے 2، 2 وکٹیں حاصل کیں۔
اس سے قبل، یو اے ای نے ٹاس ہار کر پہلے بیٹنگ کی اور مقررہ 20 اوورز میں 9 وکٹوں پر 160 رنز بنائے۔صہیب خان (68 رنز) نے 48 گیندوں پر 4 چھکوں اور 6 چوکوں کی مدد سے شاندار اننگز کھیلی۔
علی شان شرفو (40 رنز) نے صہیب خان کے ساتھ مل کر تیسری وکٹ کے لیے 84 رنز کی شراکت قائم کی۔افغانستان کی جانب سے عظمت اللہ عمرزئی نے بہترین بالنگ کرتے ہوئے 4 وکٹیں حاصل کیں، جبکہ مجیب الرحمان نے 2 اور راشد خان نے 1 وکٹ حاصل کی ۔
