سارن: تالاب میں گرنے سے بچی کی موت، ایف آئی آر درج

چھپرا، 03 فروری (یواین آئی)بہار کے سارن ضلع کے مفصل تھانہ علاقہ میں منگل کوتالاب میں گرنے سے ایک بچی کی موت ہو گئی۔
پولیس ذرائع نے آج یہاں بتایا کہ لوہڑی گائوں باشندہ وکرم کمار ساہ کی بیٹی آیوشی کماری (عمر 04 سال) گاؤں کے چند دیگر بچوں کے ساتھ تالاب کے کنارے کھیل رہی تھی۔ اسی دوران پاؤں پھسلنے کے باعث وہ تالاب کے گہرے پانی میں جا گری، جس کے نتیجے میں اس کی موت ہو گئی۔
واقعے کی اطلاع اہل خانہ کو اس وقت ملی جب آیوشی کافی دیر تک گھر واپس نہیں لوٹی، جس کے بعد اس کے اہل خانہ نے اس کے ساتھ کھیلنے والے بچوں سے جب پوچھ گچھ کی تو بچوں نے اس کے تالاب میں گرنے کی اطلاع دی۔
ذرائع نے بتایا کہ اس کے بعد اہل خانہ مذکورہ تالاب کے قریب پہنچے، جہاں انہوں نے آیوشی کی لاش کو تالاب میں تیرتا ہوا پایا۔
واقعہ کی اطلاع ملنے پر موقع پر پہنچی پولیس نے لاش کو تالاب سے باہر نکال کر پوسٹ مارٹم کے لیے صدر اسپتال بھیج دیا۔ پولیس اس معاملے میں متوفیہ کے اہل خانہ کی جانب سے موصولہ درخواست پر ایف آئی آر درج کر کے تفتیش کر رہی ہے۔