انگلینڈ کا سری لنکا میں سیریز پر قبضہ: دوسرے ٹی ٹوئنٹی میں میزبان ٹیم کو شکست

پلے کیلے3فروری (یو این آئی ) انگلینڈ نے دوسرے ٹی ٹوئنٹی میچ میں سری لنکا کو دلچسپ مقابلے کے بعد ڈک ورتھ لوئس میتھڈ کے تحت 6 وکٹوں سے ہرا کر تین میچوں کی سیریز میں 2-0 کی فیصلہ کن برتری حاصل کر لی ہے۔ ٹام بینٹن کی ناقابلِ شکست نصف سنچری انگلش فتح میں کلیدی ثابت ہوئی۔
اتوار کی شب کھیلے گئے میچ میں انگلینڈ نے ٹاس جیت کر پہلے بولنگ کا فیصلہ کیا۔ سری لنکا کے بلے بازوں نے جاندار بیٹنگ کا مظاہرہ کرتے ہوئے مقررہ 20 اوورز میں 5 وکٹوں پر 189 رنز کا بڑا مجموعہ ترتیب دیا۔
پون رتنائیکے 40، کامل مشارا 36 اور پتھم نسانکا 34 رنز بنا کر نمایاں رہے۔ کپتان چرتھ اسالنکا نے آخر میں 28 رنز کی جارحانہ اننگز کھیلی۔
انگلش بولرجوفرا آرچر نے 2 وکٹیں حاصل کیں، جبکہ عادل رشید، لیام ڈاوسن اور ول جیکس نے ایک ایک کھلاڑی کو آؤٹ کیا۔
سری لنکا کی اننگز کے بعد بارش کی وجہ سے کھیل کافی دیر تک رکا رہا، جس کے بعد امپائرز نے اوورز کم کر دیے اور انگلینڈ کو 168 رنز کا نیا ہدف (DLS کے تحت) دیا گیا۔
ہدف کے تعاقب میں انگلش اوپنرز نے تیز رفتار آغاز فراہم کیا۔ انگلینڈ نے مطلوبہ ہدف 16.4 اوورز میں 4 وکٹوں کے نقصان پر حاصل کر لیا۔
ٹام بینٹن محض 33 گیندوں پر 54 رنز بنا کر ناٹ آؤٹ رہے اور اپنی ٹیم کو فتح کی دہلیز تک لے گئے۔
جوز بٹلر نے 39، کپتان ہیری بروک نے 36 اور سیم کرن نے ناقابلِ شکست 20 رنز بنا کر جیت میں اہم کردار ادا کیا۔سری لنکن بولر متھیشا پتھیرانہ نے 2 وکٹیں لیں، جبکہ دشن شانکا اور دونتھ ویلالگے نے ایک ایک شکار کیا۔انگلینڈ نے اس جیت کے ساتھ ہی سیریز اپنے نام کر لی ہے، جبکہ سری لنکا کے لیے آخری میچ اب محض اپنی ساکھ بچانے کا ذریعہ ہوگا۔