مودی نے سومناتھ سوا بھیمان پَرؤ کے آغاز پر اہلِ وطن کو مبارکباد دی

نئی دہلی، 08 جنوری (یواین آئی) وزیراعظم نریندر مودی نے جمعرات کو سومناتھ سوابھیمان پَرؤ کے آغاز پر اہلِ وطن کو مبارکباد دی اور سومناتھ مندر سے جڑی اپنی یادیں سوشل میڈیا پر شیئر کیں۔
وزیراعظم نے ذکر کیا کہ جنوری 1026 میں سومناتھ پر پہلا حملہ ہوا اور بعد کی صدیوں میں بار بار حملوں کے باوجود عقیدت مندوں کے غیر متزلزل اعتقاد اور ہندوستان کے تہذیبی عزم نے یہ یقینی بنایا کہ سومناتھ کا بار بار ازسرِ نو تعمیر ہوتا رہے ۔
انہوں نے کہاکہ سومناتھ سوا بھیمان پَرؤ بھارت ماتا کے اُن بے شمار فرزندوں کو یاد کرنے کا تہوار ہے جنہوں نے کبھی اپنے اصولوں اور اقدار سے سمجھوتہ نہیں کیا۔ حالات کتنے ہی مشکل کیوں نہ رہے ہوں، ان کا عزم اٹل رہا اور ہندوستانی اقدار کے تئیں ان کی وابستگی غیر متزلزل رہی۔
وزیراعظم نے سومناتھ کی اپنی سابقہ یاترا کی جھلکیاں شیئر کیں اور شہریوں کو یادیں شیئر کرکے جشن میں شامل ہونے کی دعوت دی۔ انہوں نے 31 اکتوبر 2001 کے پروگرام کو یاد کیا، جو اُس وقت کے صدر ڈاکٹر راجندر پرساد کی موجودگی میں 1951 میں دوبارہ تعمیر شدہ سومناتھ مندر کے افتتاح کے 50 سال مکمل ہونے کے موقع پر منعقد ہوا تھا۔ اس میں مندر کی تعمیرِ نو میں سردار ولبھ بھائی پٹیل، کے ۔ایم۔ مُنشی اور کئی دیگر شخصیات کی کوششوں کو اہم بتایا گیا۔ 2001 کا پروگرام سردار پٹیل کی 125ویں جینتی کے ساتھ ہی منعقد ہوا تھا اور اس میں اُس وقت کے وزیراعظم اٹل بہاری واجپائی، اُس وقت کے وزیرِ داخلہ لال کرشن آڈوانی اور کئی دیگر معزز شخصیات موجود تھیں۔
مسٹر مودی نے مستقبل کا ذکر کرتے ہوئے اس بات پر زور دیا کہ 2026 میں 1951 کے اُس عظیم الشان تقریب کی 75ویں سالگرہ ہوگی، جب سومناتھ مندر قوم کو وقف کیا گیا تھا۔ انہوں نے کہاکہ’’یہ کامیابی صرف مندر کی تعمیرِ نو کی نہیں بلکہ ہماری تہذیب کی اُس ناقابل شکست آتما کے بارے میں بھی ہے جو نسل در نسل تحریک دیتی رہتی ہے ۔‘‘