چلہ کلان:ابھی تو پکچر …؟

امسال مئی میں آپریشن سندور کے بعد سے مسلسل کہا جارہا ہے کہ یہ تو جناب ٹریلر تھا … ابھی پکچر باقی ہے۔ کسی بالی ووڈ فلم میں بھی ہیرو کہتا ہے کہ ابھی تو پکچر باقی ہے… ہم تو صاحب یقینا چاہیں گے کہ اللہ میاں پاکستان کو اتنی عقل دے کہ آپریشن سندو ر۰ء۲ کی نوبت ہی نہ آئے … لیکن … لیکن کہتے ہیں نا کہ خدا گنجے کو ناخن نہ دے … لیکن ہمارا ہمسایہ ایسا ہے کہ یہ گنجا ہے اور اس کے ناخن بھی ہیں‘ جن سے یہ اپنے سر کی کھجلی کرتا رہا ہے…اور اسے اس کھجلی کاپھر آپریشن کی شکل میں نتیجہ بھی بھگتنا پڑتا ہے… خیر آپریشن سندور ۰ء۲ ہو یا نہیں ‘ اس حوالے سے پکچر ابھی باقی ہے یا نہیں ‘ یہ تو ہم نہیں جانتے ہیں… بالکل بھی نہیں جانتے ہیں… اسی طرح جس طرح ہم یہ نہیں جانتے ہیں کہ چلہ کلان نے آتے ہی ہمیں صرف ٹریلر دکھایا ‘ ابھی پکچر باقی ہے یا یہ کہ… کہ اس نے آتے ہی ساری پکچر ہی ختم کردی … سوفیصد مکمل کردی … ہم تو چاہیں گے کہ ایسا نہ ہو… اور یہ محض ایک ٹریلر ہو ‘ پکچر ابھی باقی ہو… لیکن… لیکن صاحب پچھلے کچھ برس اگر کوئی حقیقت رکھتے ہیں تو… تو صاحب چلہ کلان نے آتے ہی اپنا کام کیا اور اب یہ باقی کے ایام خود آرام سے بیٹھے گا لیکن… لیکن ہمارا آرام حرام کر دے گا کہ… کہ ہمارا آرام یہ بالکل بھی نہیں ہے کہ… کہ چلہ کلان میں دھوپ ہو… چلہ کلان پورا پورا خشک رہے … بارش ہو اور نہ برفباری ہو… نہیں صاحب اس میں ہمارا آرام نہیں ہے… سچ تو یہ ہے کہ ایسا آرام ہمارے لئے حرام ہے… آرام تو صاحب ہمیں تب آئیگا جب چلہ کلان بالکل بھی آرام سے نہیں بیٹھے گا … کبھی بالائی علاقوں کی سیر کرے تو کبھی میدانی حصوں کی گردش … کبھی بارشیں تو کبھی برفباری… بیچ بیچ میں دھوپ بھی چلے گی… لیکن … لیکن یہ اتنی ہی ہونی چاہئے جتنی سالن میں نمک ہوتا ہے… اس سے زیادہ نہیں کہ… کہ یقینا کریں کہ اگر ہم یہ جان جائیں کہ حالیہ کچھ برسوں کی خشک سالی… موسم سرما اور چلہ کلان کی خشک سالی نے کیا گل کھلائیں ہیں تو… تو اللہ میاں کی قسم ہم اور آپ یہ دعا کریں گے… ۷x۲۴ دعا کریں گے کہ … کہ یہ ابھی ٹریلر ہو… ابھی چلہ کلان کی پکچر سچ میں باقی ہو ۔ ہے نا؟