روہت شرما وجے ہزارے ٹورنامنٹ میں ممبئی کے لیے دو میچ کھیلیں گے

ممبئی، 20 دسمبر (یو این آئی) ہندوستانی اسٹار بلے باز روہت شرما کو وجے ہزارے ٹرافی کے پہلے دو میچوں کے لیے ممبئی کی ٹیم میں شامل کیا گیا ہے۔ شاردول ٹھاکر ممبئی ٹیم کی کپتانی کریں گے۔ ٹیم میں سرفراز خان، مشیر خان اور انگکرس رگھوونشی بھی شامل ہیں۔ اس کے علاوہ ٹیم میں متعدد نئے کھلاڑی بھی شامل کیے گئے ہیں۔
سال 2019 میں انڈیا ایمرجنگ کے لیے چار لسٹ اے میچ کھیلنے والے چنمے ستار کو ٹیم میں جگہ ملی ہے، ساتھ ہی بلے باز ایشان ملچندانی اور تیز گیندباز اونکار ترمالے کو بھی شامل کیا گیا ہے۔ حال ہی میں سن رائزرز حیدرآباد نے آئی پی ایل کی نیلامی میں اونکار ترمالے کو خریدا تھا۔
مشہور کھلاڑیوں میں سدھیش لاڈ، وکٹ کیپر ہاردک تامورے اور اسپن جوڑی شمس ملانی اور تنوش کوٹیان شامل ہیں۔ ٹیم میں اجنکیا رہانے، یشسوی جیسوال اور آیوش مہاترے شامل نہیں ہیں۔
ٹورنامنٹ میں ممبئی گروپ سی میں ہے۔ ممبئی 24 دسمبر کو جے پور میں سکم کے خلاف اپنی مہم شروع کرے گی۔ دو دن بعد، وہ اترکھنڈ کا سامنا کرے گی۔
وجے ہزارے ٹرافی کے لیے ممبئی کی ٹیم:
شاردول ٹھاکر (کپتان)، روہت شرما (دو میچ)، ایشان ملچندانی، مشیر خان، انگکرس رگھوونشی، سرفراز خان، سدھیش لاڈ، چنمے ستار، آکاش آنند (وکٹ کیپر)، ہاردک تامورے (وکٹ کیپر)، شمس ملانی، تنوش کوتیان، تیشار دیسپاڑے، اونکار ترمالے، سلویسٹر ڈیسوزا، سیرج پاٹل اور سوریانش شیڈگے۔