ہندوستان نے جنوبی افریقہ کو پہلے ٹی-20 میں 101 رن سے شکست دی

کٹک، 9 دسمبر (یواین آئی) ہندوستان نے جنوبی افریقہ کو پہلے ٹی-20 میں 101 رن سے شکست دی اور سیریز میں 1-0 کی برتری حاصل کی۔
ہندوستانی ٹیم نے اب تک نوویں موقع پر کسی ٹی-20 میچ میں 100 رن یا اس سے زیادہ کے فرق سے کامیابی حاصل کی ہے۔
منگل کے روز کٹک کے بارابتی اسٹیڈیم میں جنوبی افریقہ نے پہلے گیندبازی کا فیصلہ کیا۔ ہندوستان نے ہاردک پانڈیا کی نصف سنچری کی بدولت 6 وکٹوں کے نقصان پر 175 رنز بنائے۔ جواب میں مہمان ٹیم صرف 74 رن ہی بنا سکی۔ یہ ٹی-20 انٹرنیشنل میں جنوبی افریقہ کا سب سے کم اسکور ہے۔
جنوبی افریقہ کی جانب سے بلے بازی میں ٹیم کے لیے ڈیوالڈ بریویز نے سب سے زیادہ 22 رنز بنائے۔ سات کھلاڑی 10 رن بھی نہ بنا سکے۔ ہندوستان کی جانب سے آرشدیپ سنگھ، جسپریت بمراہ، ورون چکرورتی اور اکشر پٹیل نے 2-2 وکٹیں حاصل کیں۔ ہاردک پانڈیا اور شیوَم دوبے کو 1-1 وکٹ ملی۔