سرمائی تعطیلات کے دوران امتحاناتنہ لئے جائیں: محکمہ اعلیٰ تعلیم کی ہدایت

سرینگر/۵دسمبر
محکمہ اعلیٰ تعلیم نے جموںکشمیر کی تمام یونیورسٹیوں اور خودمختار کالجوں کو نئی ہدایات جاری کی ہیں، جن میں انہیں سختی سے یکساں تعلیمی کیلنڈر کی پابندی کرنے اور مقررہ تعطیلات کے دوران کوئی امتحان نہ لینے کی ہدایت دی گئی ہے۔
ڈائریکٹر کالجز‘جے اینڈ کے ہائر ایجوکیشن ڈیپارٹمنٹ، ڈاکٹر شیخ اعجاز بشیر کی جانب سے جاری کردہ مراسلے کے مطابق کشمیر یونیورسٹی، جموں یونیورسٹی، کلسٹر یونیورسٹیز آف سرینگر و جموں اور تمام خودمختار کالجوں کو یاددہانی کرائی گئی ہے کہ وہ مئی ۲۰۲۲ میں نوٹیفائی کیے گئے یکساں تعلیمی کیلنڈر کی مکمل پابندی کریں۔
محکمے نے کہا ہے کہ تعطیلات سخت سردی، دھند یا گرمیوں کی شدید لہر کے دوران طلبہ و عملے کو ضروری آرام فراہم کرنے کے لیے ہوتی ہیں، اور اسی دوران انٹرن شپس، صنعتی دوروں اور دیگر تعلیمی سرگرمیوں کا وقت بھی نکالا جاتا ہے۔
مراسلے میں کہا گیا ہے کہ تعطیلات کے دوران سیمسٹر کے اختتامی، ضمنی یا خصوصی امتحانات لینا تعطیلات کے مقصد کو ناکام بناتا ہے اور طلبہ و اساتذہ کی ذہنی و جسمانی صحت پر منفی اثر ڈالتا ہے۔
مراسلے میں مزید کہا گیا ہے’’سابقہ مراسلے کے تسلسل میں تمام اداروں کو ہدایت دی جاتی ہے کہ وہ مقررہ تعطیلات کے دوران کسی قسم کا امتحان شیڈول نہ کریں۔ امتحان سے متعلق تمام سرگرمیاں نافذالعمل یکساں تعلیمی کیلنڈر کے مطابق ہی ہوں‘‘۔
محکمہ اعلیٰ تعلیم نے تمام اداروں سے ان ہدایات پر مکمل تعاون اور عمل درآمد کو یقینی بنانے کی اپیل کی ہے۔