آئی جی پی جموں کا پونچھ دورہ سیکورٹی منظر نامے کا لیا جائزہ

جموں/۱۹نومبر
جموں کے انسپکٹر جنرل آف پولیس (آئی جی پی) بھیم سین تتی نے بدھ کے روز سرحدی ضلع پونچھ کا دورہ کرکے مجموعی سکیورٹی صورتحال اور فورسز کی تیاریوں کا تفصیلی جائزہ لیا۔
دہلی میں۱۰نومبر کو پیش آئے کار دھماکے ، جس میں ۱۵؍افراد جاں بحق ہوئے تھے ، کے بعد پونچھ سمیت سرحدی علاقوں میں سکیورٹی مزید سخت کر دی گئی ہے اور نگرانی بھی بڑھا دی گئی ۔ اسی تناظر میں آئی جی پی نے اہلکاروں سے زمینی صورتحال کی بریفنگ لی اور مختلف اہم مقامات کا دورہ کیا۔
ذرائع کے مطابق آئی جی پی نے اپنے دورے کے دوران فوج، پولیس اور انٹیلی جنس ایجنسیوں کے سینئر افسران کے ساتھ ایک تفصیلی میٹنگ بھی کی، جس میں سرحدی سیکٹرز میں جاری حفاظتی انتظامات، نگرانی کے جدید طریقۂ کار، مشکوک سرگرمیوں پر بروقت ردعمل اور مختلف یونٹس کے درمیان مربوط ہم آہنگی پر غور کیا گیا۔ انہیں بتایا گیا کہ دہلی دھماکے کے بعد بارڈر کے نزدیک حساس علاقوں میں گشت میں اضافہ کیا گیا ہے ، مشکوک نقل و حرکت پر نظر رکھی جا رہی ہے اور ضرورت پڑنے پر آپریشنل تیاریوں کو مزید تقویت دی جا سکتی ہے ۔
آئی جی پی نے ضلع میں موجود فورسز کی تیاریوں پر اطمینان کا اظہار کرتے ہوئے اس بات پر زور دیا کہ بارڈر کے قریب کسی بھی مشکوک سرگرمی کا نوٹس فوراً لیا جائے اور نگرانی نظام کو مزید مؤثر بنایا جائے ۔ انہوں نے کہا کہ حالیہ واقعات کے بعد نہ صرف جموں خطہ بلکہ پورے جموں و کشمیر میں سکیورٹی کے معاملات انتہائی اہمیت اختیار کر چکے ہیں اور ایسے حالات میں فورسز کے درمیان قریبی تال میل اور مشترکہ حکمت عملی لازمی ہے ۔
ذرائع کے مطابق آئی جی پی نے افسران کو ہدایت دی کہ علاقے میں انٹیلی جنس جمع آوری کو بہتر بنایا جائے ، اہم تنصیبات کی سکیورٹی مضبوط کی جائے اور بارڈر کے نزدیک ہر طرح کے خطرات کا بروقت جائزہ لیا جائے ۔ انہوں نے کہا کہ صورتحال کا تقاضا ہے کہ فورسز ہر لمحہ تیار رہیں اور عوام کے تعاون سے امن و امان کو برقرار رکھا جائے ۔
پولیس حکام نے بتایا کہ پونچھ میں نگرانی کے نظام کو مزید فعال بنایا گیا ہے اور مشکوک عناصر پر سخت نظر رکھی جا رہی ہے ۔ انہوں نے کہا کہ سکیورٹی ادارے حالات پر مکمل نظر رکھے ہوئے ہیں اور ضرورت پڑنے پر حفاظتی اقدامات مزید سخت کیے جائیں گے ۔