وادی میں شبانہ سردیوں کا زور برابر جاری‘ موسم خشک

سرینگر/۱۹نومبر
خشک موسم کے بیچ وادی کشمیر میں سخت ترین سردیوں کے لئے مشہور چالیس روزہ چلہ کلان سے قبل ہی ٹھٹھرتی سردیوں کا زور برابر جاری ہے ۔
محکمہ موسمیات کے ایک ترجمان کے مطابق گرمائی دارلحکومت سری نگر میں شبانہ درجہ حرارت منفی۷ء۱ ڈگری سینٹی گریڈ ریکارڈ ہوا ہے ۔
سرینگر میں۱۵نومبر کی رات سرد ترین رات ریکارڈ ہوئی تھی جب شبانہ درجہ حرارت منفی۴ء۲ڈگری سینٹی گریڈ ریکارڈ ہوا تھا۔
وادی کے مشہور سیاحتی مقام پہلگام میں کم از کم درجہ حرارت منفی۰ء۲ڈگری سینٹی گریڈ ریکارڈ ہوا ہے جبکہ وادی کے دوسرے مشہور سیاحتی مقام گلمرگ میں شبانہ درجہ حرارت ۴ء۱ڈگری سینٹی گریڈ ریکارڈ ہوا ہے ۔
شمالی ضلع کپوارہ میں کم از کم درجہ حرارت منفی۸ء۱ڈگری سینٹی گریڈ جبکہ گیٹ وے آف کشمیر کے نام سے مشہور قصبہ قاضی گنڈ میں کم از کم درجہ حرارت منفی۰ء۱ڈگری سینٹی گریڈ ریکارڈ ہوا ہے ۔
محکمہ موسمیات کے مطابق وادی میں ماہ رواں کے اختتام تک موسم مجموعی طور پر خشک رہنے کا امکان ہے ۔
دریں اثنا وادی میں بدھ کو بھی صبح سے ہی موسم خشک رہا اور نحیف سی دھوپ بھی کھلی رہی۔یو این آئی