موسم سرما کیلئے تمام تیاریوں کو حتمی شکل دی گئی ہے ـ:انشول گرگ

یو این آئی
سری نگر/۱۹نومبر
صوبائی کمشنر کشمیر‘ انشول گرگ کا کہنا ہے کہ موسم سرما کے پیش نظر انتظامیہ نے تمام بڑی تیاریوں کو حمتی شکل دی گئی ہے ۔
گرگ نے کہا کہ برف ہٹانے ، بجلی فراہمی کی بحالی سے لے کر ضروری خدمات کی دستیابی تک کی تمام تیاریوں کو مکمل کیا گیا ہے ۔
صوبائی کمشنر نے بدھ کو یہاں نامہ نگاروں کو بتایا’’کپوارہ اور بانڈی پورہ جیسے سرحدی اضلاع میں موسم سرما کیلئے ضروری اشیا کو پہلے ہی ذخیرہ کیا گیا ہے ‘‘۔
صوبائی کمشنر نے کہا کہ ان اضلاع میں۸۷۲نامزد سٹیشنز ہیں جہاں چار ماہ پہلے سے اناج اور دیگر ضروری سامان کو ذخیرہ کیا گیا ہے ۔
ان کا کہنا ہے کہ یہ پورا عمل مکمل ہے اور ایل پی جی کی دستیابی کو بھی یقینی بنایا گیا ہے تاکہ سخت موسم میں لوگوں کو کسی قسم کی دقت کا سامنا نہ کرنا پڑے ۔
گرگ نے کہا کہ کشمیر کے لوگ قدرتی طور پر موسم سرما کیلئے اچھی طرح سے تیار ہوتے ہیں اور روایتی جانکاری اور شدید سردی کے حالات سے واقف ہوتے ہیں۔
صوبائی کمشنر نے کہا’’پوری وادی میں ڈیزاسٹر مینجمنٹ سسٹم پوری طرح سے فعال ہے ۔ سری نگر میں انٹیگریٹڈ کمانڈ اینڈ کنٹرول سنٹر، ضلعی سطح کے کنٹرول رومز کے ساتھ، کسی بھی صورتحال کا جواب دینے کیلئے افسران چوبیس گھنٹے ڈیوٹی پر مامور رہیں گے ‘‘۔
ان کا کہنا ہے کہ انتظامیہ بلاتعطل خدمات کو یقینی بنانے اور موسم سے متعلق کسی بھی خلل کا فوری جواب دینے کیلئے پرعزم ہے ۔