ترواننت پورم، 18 نومبر (یو این آئی) کیرالا اسٹیٹ الیکشن کمیشن نے تمام میڈیا اداروں کو ہدایت دی ہے کہ وہ آئندہ ہونے والے مقامی بلدیاتی انتخابات کے دوران مقرر کردہ ضابطئہ اخلاق کی سختی سے پابندی کریں۔
کمیشن کے مطابق، پولنگ ختم ہونے سے 48 گھنٹے قبل شروع ہونے والی "خاموشی کی مدت” کے دوران ایسی کسی بھی تشہیر کی اجازت نہیں ہوگی جو ووٹروں کو متاثر کرے یا انتخابی نتائج پر اثر انداز ہو۔
اس مدت میں دوران ایگزٹ پول ، چاہے وہ کسی سیاسی جماعت یا امیدوار کے حق میں ہوں یا پھر تنقیدی نوعیت کے ہوں، مکمل طور پر ممنوع ہوں گے ۔ یہ پابندی الیکٹرانک میڈیا پر بھی یکساں طور پر نافذ رہے گی۔
ضابطئہ اخلاق نافذ ہوتے ہی اداروں کو کیبل ٹیلی ویژن نیٹ ورک (ریگولیشن) ایکٹ کا پابند رہنا ہوگا۔ ٹی وی چینلز کو براڈکاسٹ کنٹینٹ کمپلینٹس کونسل (بی سی سی سی) کی ہدایات پر عمل کرنا ہوگا، جبکہ پرنٹ میڈیا کو پریس کونسل آف انڈیا کے معیارات کی پیروی کرنا ہوگی۔
اسی طرح، انتخابات سے متعلق تمام نشریات میں نیوز براڈکاسٹرس اسٹینڈرڈس اتھارٹی (این بی ایس اے ) کے رہنما خطوط پر سختی سے عمل کرنا ضروری ہوگا۔
ڈیجیٹل دھوکہ دہی میں اضافے کی بڑھتی تشویش کے پیش نظر کمیشن نے نقلی تصاویر، من گھڑت آڈیو کلپس، ڈیپ فیک اور دیگر گمراہ کن مواد کی تیاری اور اس کے پھیلاؤ پر مکمل پابندی لگا دی ہے ۔
ایسا مواد جو خواتین کی توہین کرتا ہو، انہیں کمتر دکھاتا ہو، بچوں کو سیاسی تشہیر میں استعمال کرتا ہو یا جانوروں کے خلاف تشدد کو فروغ دیتا ہو، سختی سے ممنوع قرار دیا گیا ہے ۔
انتخابی تشہیر میں استعمال ہونے والے کسی بھی طرح سے ڈیجیٹلی تبدیل کیے گئے مواد پر واضح طور پر ”اے آئی۔ جنریٹیڈ”، ”ڈیجیٹل طور پر بہتر بنایا گیا” یا سینتھیٹک کنٹینٹ” لکھا ہونا چاہیے ۔
یہ عبارت ویڈیو اسکرین کے کم از کم 10 فیصد حصے پر ظاہر ہو، جبکہ آڈیو مواد میں اس کا اعلان ابتدائی 10 فیصد دورانیے کے اندر ہونا ضروری ہے ۔ مواد کے میٹا ڈیٹا اور تفصیل میں بھی اس کے تخلیق کار یا ذمہ دار ادارے کا نام شامل ہونا چاہیے ۔
کسی شخص کی اجازت کے بغیر اس کی شکل و صورت، شناخت یا آواز میں گمراہ کن تبدیلی کرنا یا چھیڑ چھاڑ کرنا ممنوع ہے ۔ ایسے کوئی بھی مشکوک یا ممنوع مواد ملنے کی صورت میں اسے تین گھنٹے کے اندر ہٹانا ہوگا اور مواد تیار کرنے والے کو سرکاری انتباہ جاری کیا جائے گا۔
کمیشن نے سیاسی جماعتوں کو ہدایت دی ہے کہ وہ اے آئی کے ذریعے تیار کردہ تمام تشہیری مواد کا مکمل ریکارڈ رکھیں۔
