تلنگانہ:قواعد کی خلاف ورزی،یکم جنوری سے اب تک 1.25 لاکھ گاڑیوں کے خلاف مقدمات درج

حیدرآباد 18نومبر(یواین آئی) روڈ ٹرانسپورٹ اتھارٹی (آرٹی اے ) کے عہدیداروں نے ان تمام پرائیویٹ ہیوی گاڑیوں پر اپنی توجہ مرکوز کر دی ہے جو سڑکوں پر ٹریفک کے قواعد و ضوابط کی خلاف ورزی کرتے ہوئے چل رہی ہیں۔ ریاست تلنگانہ میں سڑک حادثات میں بڑھتی ہوئی اموات کی تعداد کے پیش نظر، محکمہ نے سختی سے کارروائی شروع کر دی ہے ۔ انفورسمنٹ اینڈ ویجلنس کے جوائنٹ ٹرانسپورٹ کمشنر، چندر شیکھر گوڑ نے بتایا کہ صرف پانچ دنوں میں کئے گئے معائنوں میں 1460 گاڑیوں کو ضبط کیا گیا ہے ۔
انہوں نے واضح کیا کہ حادثات میں مرنے والوں کی تعداد اب قدرتی آفات یا کووڈ سے مرنے والوں کی تعداد سے بھی زیادہ ہوتی جا رہی ہے ، جو سماج کے لئے ایک تشویش ناک بات ہے ۔ ان کے مطابق، تقریباً 70% حادثات انسانی یا ڈرائیور کی غلطیوں کی وجہ سے ہوتے ہیں، جبکہ باقی 30% سڑک یا گاڑی کی ناقص حالت کے سبب پیش آتے ہیں۔
روڈ سیفٹی کو یقینی بنانے کے لئے محکمہ نے ایک ایکشن پلان تیار کیا ہے ، جس میں بیداری، نفاذ، انجینئرنگ اور ایمرجنسی کیئر (ہنگامی دیکھ بھال) شامل ہیں۔ انفورسمنٹ کے تحت، یکم جنوری سے اب تک 1.25 لاکھ گاڑیوں کے خلاف مقدمات درج کئے جا چکے ہیں۔
تازہ ترین کارروائی میں، 12 نومبرکو وزیر ٹرانسپورٹ کی ہدایت پر 33 اضلاع میں انفورسمنٹ اسکواڈ تشکیل دیئے گئے ۔ گزشتہ چار دنوں میں، تقریباً 2200 گاڑیوں کے خلاف مقدمات درج کئے گئے اور 1500گاڑیاں ضبط کی گئیں، جن میں 160 گاڑیاں اوورلوڈنگ میں ملوث تھیں۔ علاوہ ازیں، تین فلائنگ اسکواڈس نے بھی 250 گاڑیوں پر کارروائی کی۔
جوائنٹ ٹرانسپورٹ کمشنر نے اوورلوڈنگ پر خاص طور پر سخت انتباہ جاری کیا۔ انہوں نے کہا کہ اگر کوئی گاڑی اوورلوڈ کے ساتھ سڑک پر پکڑی گئی تو بھاری جرمانے کے ساتھ ساتھ رجسٹریشن، ڈرائیونگ لائسنس اور پرمٹ کی منسوخی جیسی کارروائیاں کی جائیں گی۔ انہوں نے مزید کہا کہ رات کے وقت حادثات سے بچنے کے لئے جلد ہی ایک حکم نامہ جاری کیا جائے گا جس کے تحت تمام بھاری اور ٹرانسپورٹ گاڑیوں کے لئے ریڈیم ریفلیکٹیو ٹیپ لگانا لازمی ہو گااور فِٹنس کے وقت اس کی جانچ کی جائے گی۔
حکام نے تمام پرائیویٹ گاڑیوں کے ڈرائیوروں کو سختی سے ہدایت دی ہے کہ وہ قواعد کی مکمل پابندی کریں، ورنہ ان کے خلاف مستقل سخت اقدامات کئے جائیں گے ۔