تین ماہ کے وقفے کے بعد واپسی کرنے والے رشبھ پنت کا بلّہ نہیں چلا

بنگلورو 31 اکتوبر (یواین آئی) ہندوستانی اسٹار وکٹ کیپر بلے باز رشبھ پنت چوٹ سے صحت یاب ہونے کے بعد آخرکار کرکٹ کے میدان میں واپس آگئے ہیں۔ پنت نے جنوبی افریقہ اے کے خلاف دو میچوں پر مشتمل غیر تسلیم شدہ ٹیسٹ سیریز کے پہلے میچ میں انڈیا اے کی جانب سے بلے بازی کی، لیکن وہ بری طرح ناکام رہے۔ تقریباً تین ماہ کے وقفے کے بعد واپسی کرنے والے پنت کا بلّہ نہیں چلا اور وہ صرف 17 رن بنا کر آؤٹ ہو گئے۔
پنت نے اس سال کے آغاز میں انگلینڈ کے خلاف چوتھے ٹیسٹ کے دوران پاؤں میں فریکچر ہونے کے بعد پہلی بار میدان میں قدم رکھا۔ جنوبی افریقہ اے کے خلاف دو میچوں کی غیر تسلیم شدہ ٹیسٹ سیریز کے لیے رشبھ پنت کو انڈیا اے کا کپتان مقرر کیا گیا ہے۔ چوٹ کی وجہ سے وہ حال ہی میں ویسٹ انڈیز کے خلاف کھیلی گئی دو میچوں کی ٹیسٹ سیریز سے باہر رہے تھے۔
طویل عرصے کے بعد میدان میں اترنے والے پنت کے لیے یہ میچ اپنی فٹنس اور فارم ثابت کرنے کا ایک اہم موقع تھا۔ تاہم، وہ کوئی خاص کارکردگی نہ دکھا سکے اور جلد ہی وکٹ گنوا بیٹھے۔ جنوبی افریقہ اے کے خلاف پہلے میچ کی پہلی اننگز میں پانچویں نمبر پر بلے بازی کرنے آئے پنت نے 20 گیندوں کا سامنا کرتے ہوئے دو چوکوں کی مدد سے 17 رن بنائے۔ انہوں نے اچھی شروعات کی تھی، مگر وہ بڑی اننگز کھیلنے میں ناکام رہے اور 41ویں اوور میں تیزگیندباز اوکولے سیلے کی گیند پر آؤٹ ہو گئے۔