ٹرمپ اور پوتن کے درمیان ٹیلی فونک رابطہ، روس-یوکرین جنگ کے خاتمے پر بات چیت

واشنگٹن، 17 اکتوبر (یو این آئی) ٹرمپ اور پوتن کے درمیان اہم ٹیلی فونک رابطہ ہوا ہے ، مشرقِ وسطیٰ کے امن اور روس-یوکرین جنگ کے خاتمے پر بات چیت ہوئی۔
امریکی صدر ڈونلڈ ٹرمپ اور روسی صدر ولادیمیر پوتن کے درمیان مثبت ٹیلی فونک گفتگو ہوئی جس میں مشرقِ وسطیٰ میں امن کے حالیہ اقدامات اور روس۔یوکرین جنگ کے خاتمے سے متعلق امور پر تبادلہ خیال کیا گیا۔
صدر ٹرمپ کے مطابق صدر پوتن نے مشرقِ وسطیٰ میں امن کے قیام پر امریکہ اور ٹرمپ انتظامیہ کو مبارکباد دیتے ہوئے کہا کہ یہ کامیابی صدیوں پرانے خواب کی تعبیر ہے ۔
ٹرمپ نے کہا کہ مشرقِ وسطیٰ میں حاصل ہونے والی کامیابی روس۔یوکرین جنگ کے مذاکرات میں بھی پیش رفت میں مدد دے گی۔
ٹیلی فونک گفتگو میں صدر پیوٹن نے خاتونِ اول میلینیا ٹرمپ کی بچوں سے متعلق سرگرمیوں کو سراہا اور ان کے کردار کو جاری رکھنے کی خواہش ظاہر کی۔
دونوں رہنماؤں نے جنگ کے بعد روس اور امریکہ کے درمیان تجارتی تعلقات کی بحالی پر بھی بات چیت کی، صدر ٹرمپ نے بتایا کہ اگلے ہفتے دونوں ممالک کے اعلیٰ سطحی مشیروں کی ملاقات ہوگی جس کی قیادت امریکی وزیرِ خارجہ مارکو روبیو کریں گے ۔
ملاقات کی جگہ کا تعین بعد میں کیا جائے گا، ٹرمپ کے مطابق وہ اور پوتن بعدازاں ہنگری کے دارالحکومت بوداپیسٹ میں براہِ راست ملاقات کریں گے تاکہ روس۔یوکرین جنگ کے خاتمے کے امکانات پر مزید غور کیا جائے ۔
صدر ٹرمپ نے مزید کہا کہ وہ کل صدر زیلینسکی سے اوول آفس میں ملاقات کریں گے ، جہاں صدر پوتن کے ساتھ ہونے والی گفتگو سمیت اہم امور پر بات چیت کی جائے گی، انھوں نے کہا کہ آج کی گفتگو سے امن کے قیام کی سمت میں نمایاں پیش رفت ہوئی ہے ۔