شاہین آفریدی نے مانگ کر بال لی اور کہا میچ بدل دوں گا: شان مسعود

لاہور 16 اکتوبر(یواین آئی ) پاکستان ٹیسٹ ٹیم کے کپتان شان مسعود نے کہا کہ شاہین آفریدی نے مانگ کر بال لی اور کہا میچ بدل دوں گا اور پھر سب نے دیکھا کہ شاہین آفریدی نے شاندار اسپیل کیا۔ قذافی اسٹیڈیم میں کھیلے گئے پہلے ٹیسٹ میچ میں جنوبی افریقہ کو 93 رنز سے شکست دینے کے بعد شان مسعود نے گفتگو کرتے ہوئے کہا کہ اگر ٹیسٹ چیمپئن شپ میں نمایاں پوزیشن حاصل کرنی ہے تو کھیل کے ہر شعبے میں پرفارمنس دکھانا ہو گی۔ انہوں نے کہا کہ جنوبی افریقہ کے خلاف ٹیسٹ میں ٹیم نے بہترین کھیل پیش کیا۔ علم میں رہے کہ پاکستان اور جنوبی افریقہ کی ٹیمیں دوسرا ٹیسٹ میچ کھیلنے کے لیے کل اسلام آباد روانہ ہوں گی جو 20 اکتوبر سے راولپنڈی میں شروع ہو گا۔
ذرائع کا بتانا ہے کہ پنڈی ٹیسٹ میچ کے لیے بھی اسپنرز کے سازگار وکٹ بنائی جا رہی ہے اور پی سی بی کے پچ انچارج تین دن پہلے ہی راولپنڈی میں پچ تیار کرانے میں مصروف ہیں۔
یواین آئی أم اع