ویسٹ انڈیز 390 رنز پر ڈھیر،ہندوستان کو جیت کے لیے 121 رنز کا ہدف

نئی دہلی، 13 اکتوبر (یو این آئی ) کلدیپ یادیو اور جسپریت بمراہ (تین وکٹوں) کی شاندار کارکردگی کی بدولت ہندوستان نے دوسرے ٹیسٹ کے چوتھے دن پیر کو ویسٹ انڈیز کو 390 پر ڈھیر کردیا۔ ہندوستان کو جیتنے کے لیے اب 121 رنز درکار ہیں اور اسے ایک دن سے زیادہ کا وقت باقی ہے۔
جسٹن گریوز نے چائے کے بعد اپنی نصف سنچری مکمل کی۔ انہوں نے 85 گیندوں پر 50 رنز بنائے جس میں تین چوکے بھی شامل تھے۔ جسپریت بمراہ نے 119ویں اوور کی پانچویں گیند پر جےڈن سیلز (32) کو آؤٹ کیا، جس سے فالو آن کھیل رہی ویسٹ انڈیز کی دوسری اننگز 390 کے اسکور پر سمٹ گئی ۔ جسٹن گریوز اور جےڈن سیلز نے 10ویں وکٹ کے لیے 79 رنز جوڑے۔ اس جوڑی نے 22 سے زائد اوورز تک بیٹنگ کی۔
اس سے قبل شائی ہوپ نے لنچ کے بعد اپنی سنچری مکمل کی۔ کچھ ہی دیر بعد محمد سراج نے انہیں بولڈ کر دیا۔ شائی ہوپ نے 214 گیندوں پر 12 چوکوں اور دو چھکوں کی مدد سے 103 رنز بنائے۔ یہ ہوپ کی تیسری اور ہندوستان کے خلاف پہلی ٹیسٹ سنچری تھی۔ یہ سنچری ہوپ کے سنچری بنانے کے لیے آٹھ سال کے انتظار کے بعد آئی ہے۔ انہوں نے آخری سنچری 2017 میں بنائی تھی۔
اس کے بعد کلدیپ یادو نے ٹیون املاچ (12)، کپتان روسٹن چیس (40) اور کھری پیری (0) کو آؤٹ کیا۔ جومل واریکن (3) کو جسپریت بمراہ نے بولڈ کیا۔ اینڈرسن فلپ (2) کو بھی بمراہ نے آؤٹ کیا۔ چائے کے وقت تک ویسٹ انڈیز نے 9 وکٹوں پر 361 رنز بنا لیے تھے اور اس کی برتری کو 91 رنز تک بڑھا دیا تھا۔
اس سے قبل ویسٹ انڈیز نے کل کے اسکور سے دو وکٹ پر 173 رنز پر دوبارہ کھیل شروع کیا۔ آج صبح کے سیشن میں جان کیمبل نے چھکا لگا کر اپنی پہلی ٹیسٹ سنچری مکمل کی۔ انہوں نے اپنی سنچری کے لیے 174 گیندوں کا سامنا کیا، نو چوکے اور تین چھکے لگائے۔ اس کے ساتھ وہ سات سال میں ہندوستان کے خلاف سنچری بنانے والے ویسٹ انڈیز کے پہلے بلے باز بن گئے۔ اس سے قبل روسٹن چیس نے یہ کارنامہ انجام دیا تھا۔ رویندرا جڈیجہ نے 64ویں اوور میں انہیں ایل بی ڈبلیو کر کے ہندوستان کی تیسری وکٹ دلائی۔ انہوں نے 199 گیندوں پر 115 رنز بنائے جس میں 12 چوکے اور تین چھکے شامل تھے۔ کھانے کے وقت تک ویسٹ انڈیز کا اسکور تین وکٹ پر 252 تک پہنچ چکا تھا۔
ہندوستان کی جانب سے کلدیپ یادیو اور جسپریت بمراہ نے تین تین وکٹیں حاصل کیں۔ محمد سراج نے دو دو وکٹیں حاصل کیں۔ واشنگٹن سندر اور رویندر جڈیجہ نے ایک ایک بلے باز کو آؤٹ کیا۔