اقوام متحدہ کے جنرل سیکرٹری کا غزہ جنگ بندی معاہدے کا خیر مقدم

نیویارک،9 اکتوبر (یو این آئی) اقوام متحدہ کے جنرل سیکرٹری انتونیو گوتریس نے غزہ جنگ بندی معاہدے کا خیر مقدم کیا ہے ۔
اقوام متحدہ کے جنرل سیکرٹری انتونیو گوتریس نے اپنے جاری بیان میں کہا امریکہ، قطر، مصر اور ترکیہ کی سفارتی کوششوں کو سراہتا ہوں، فریقین معاہدے کی تمام شقوں پرمکمل طور پر عمل کریں۔
اقوام متحدہ کے جنرل سیکرٹری نے کہا کہ تمام یرغمالیوں کو باوقار طریقے سے رہا کیا جائے ، مستقل جنگ بندی کو یقینی بنایا جائے اور فریقین معاہدے کی تمام شقوں پر مکمل طور پر عمل کریں۔ انہوں نے کہا کہ اقوام متحدہ معاہدے کے مکمل نفاذ کی حمایت کرے گا، پائیدار اور اصولی انسانی امداد کی فراہمی کو تیز کرے گا اور ہم غزہ میں بحالی اور تعمیر نو کی کوششوں کو آگے بڑھائیں گے ۔
انتونیو گوتریس کا کہنا تھا کہ غزہ میں انسانی امداد اور ضروری تجارتی سامان کی فوری اور بلا روک ٹوک داخلے کو یقینی بنایا جانا چاہیے ، مصائب کا خاتمہ ہونا چاہیے ۔
انہوں نے کہا کہ تمام اسٹیک ہولڈرز اس اہم موقع سے فائدہ اٹھاتے ہوئے فلسطینی عوام کے حق خود ارادیت کو تسلیم کریں اور قبضے کو ختم کرنے کے لیے ایک قابل اعتبار سیاسی راستہ نکالیں۔