ایم ایس دھونی نے ڈرون پائلٹ تربیت مکمل کی

چنئی، 07 اکتوبر (یو این آئی) – ہندوستان کے معروف کرکٹر اور گروڑایروسپیس کے برانڈ ایمبیسیڈر، مہندر سنگھ دھونی نے چنئی میں واقع کمپنی کے ڈی جی سی اے منظور شدہ ریموٹ پائلٹ ٹریننگ آرگنائزیشن (آر پی ٹی او) میں ڈرون پائلٹ تربیت کامیابی کے ساتھ مکمل کر لی ہے۔ یہ کامیابی نہ صرف کمپنی کے ساتھ دھونی کے تعلق کو مضبوط کرتی ہے بلکہ ہندوستان کے مشہور کھیلوں کے لیجنڈ میں سے ایک کے طور پر طیارہ سازی اور ایوی ایشن ٹیکنالوجی میں قدم رکھنے کے ایک اہم لمحے کی نشاندہی بھی کرتی ہے۔
سخت تربیتی پروگرام مکمل کرنے کے بعد، دھونی اب ڈرون اُڑانے کے لیے سرٹیفائیڈ ہو گئے ہیں، جو ہندوستان کی ترقی کی کہانی میں ان کی صلاحیتوں کو اجاگر کرتا ہے۔ اس تربیت میں نظریاتی کلاسز، سیمولیٹر کے ساتھ عملی پرواز کے سیشن شامل ہیں تاکہ محفوظ اور مستند ڈرون آپریشن کو فروغ دیا جا سکے۔ گروڑ ایروسپیس نے اپنے 300 سے زیادہ ایکسلنس سینٹرز” کے نیٹ ورک اور تعلیمی اداروں کے تعاون کے ذریعے اس شعبے میں قائدانہ کردار ادا کیا ہے، تاکہ پائلٹس باضابطہ طور پر سرٹیفائیڈ ہوں اور کمپنی کی معیار اور اعتماد کے تئیں وابستگی مضبوط ہو۔
گروڑ ایروسپیس کے بانی اور سی ای او اگنیشور جے پرکاش نے کہا، "ہمارے برانڈ ایمبیسیڈر اور سرمایہ کار، ایم ایس دھونی کا ذاتی طور پر تربیت لینا اور پائلٹ کے طور پر سرٹیفائیڈ ہونا ہمارے لیے ایک اہم کامیابی ہے۔ انہوں نے بہت جلد یہ سیکھا اور تربیت میں مکمل توجہ مرکوز کی۔ ڈرون انڈسٹری میں انقلاب لانے کے ہمارے مشن میں ان کا پختہ یقین پوری ٹیم کے لیے حوصلہ افزا ہے۔”
مہندر سنگھ دھونی نے بتایا کہ انہوں نے گروڑ ایروسپیس کے ساتھ اپنا ڈی جی سی اے ڈرون پائلٹ سرٹیفیکیشن پروگرام کامیابی کے ساتھ مکمل کر لیا ہے۔ آر پی ٹی او کے تحت گروڑ ایروسپیس نے اپنے تجربہ کار ماسٹر ٹرینرز کی رہنمائی میں 2,500 سے زائد امیدوار پائلٹس کو تربیت دی ہے۔ دھونی نے گروڑ ایروسپیس کے ساتھ اپنی وابستگی جاری رکھنے اور کمپنی کی ترقی میں اپنی دلچسپی ظاہر کی۔