صائم ایوب نمبر ون ٹی ٹوئنٹی آل راؤنڈر بن گئے ،ابھیشیک شرما کو ریکارڈ ریٹنگ پوائنٹس حاصل

دبئی، یکم اکتوبر (یو این آئی ) پاکستان کے آل راؤنڈر صائم ایوب مردوں کی ٹی 20 رینکنگ میں نئے نمبر 1 آل راؤنڈر بن گئے ہیں جب کہ ہندوستانی اوپنر ابھیشیک شرما نے سب سے زیادہ ریٹنگ پوائنٹس کا ریکارڈ توڑ دیا ہے۔ انہوں نے مردوں کی T20 بیٹنگ رینکنگ میں اپنی برتری کو مزید بڑھا دیا ہے۔
ایوب آل راؤنڈر رینکنگ میں چار درجے ترقی کر کے ہندوستانی آل راؤنڈر ہاردک پانڈیا کو پیچھے چھوڑ کر پہلے نمبر پر آ گئے ہیں۔ ایوب نے ایشیا کپ میں چھ اننگز میں آٹھ وکٹیں حاصل کیں۔ تاہم انہوں نے سات اننگز میں صرف 37 رنز بنائے اور چار بار صفر پر آؤٹ ہوئے۔ افغانستان کے محمد نبی ایک درجہ تنزلی سے تیسرے نمبر پر آ گئے ہیں، جب کہ نیپال کے دیپیندر سنگھ ایری اور زمبابوے کے سکندر رضا بھی ٹاپ فائیو میں شامل ہیں۔
سری لنکا کے خلاف نصف سنچری بنانے کے بعد ابھیشیک 931 ریٹنگ پوائنٹس پر پہنچ گئے ہیں۔ اب اس نے 2020 میں قائم ڈیوڈ ملان کے 919 پوائنٹس کے ریکارڈ کو پیچھے چھوڑ دیا ہے۔ گزشتہ سال اپنا ڈیبیو کرنے والے ابھیشیک نے ایشیا کپ میں 44.85 کی اوسط اور 200 کے اسٹرائیک ریٹ سے 314 رنز بنائے اور ٹورنامنٹ کے بہترین کھلاڑی کا اعزاز حاصل کیا۔
انہیں اب انگلینڈ کے فل سالٹ پر 82 پوائنٹس کی برتری حاصل ہے جو دوسرے نمبر پر ہیں جبکہ ہندوستان کے تلک ورما تیسرے نمبر پر ہیں۔ جوس بٹلر بدستور چوتھے نمبر پر ہیں جبکہ پتھم نسانکا ایشیا کپ میں 261 رنز بنانے کے بعد پانچویں نمبر پر آگئے ہیں۔
بولرز میں ورون چکرورتی نے ایشیا کپ میں سات وکٹوں کے ساتھ اپنی پہلی پوزیشن برقرار رکھی۔ کلدیپ یادیو 17 وکٹیں لینے کے بعد نو مقام اوپر پہنچ کر 12 ویں نمبر پر پہنچ گئے ہیں۔ شاہین شاہ آفریدی 12 درجے ترقی کر کے مشترکہ 13 ویں نمبر پر آ گئے ہیں جبکہ بنگلہ دیش کے رشاد حسین 6 درجے ترقی کر کے 20 ویں نمبر پر آ گئے ہیں۔