امنجوت اور دیپتی کی بدولت ہندوستان کا فاتحانہ آغاز

گوہاٹی، 30 ستمبر (یو این آئی) امنجوت کور (57 اور ایک وکٹ) اور دیپتی شرما (53 اور تین وکٹ) کی آل راؤنڈ کارکردگی کی بدولت ہندوستان نے منگل کو ڈک ورتھ لوئس طریقہ کے تحت سری لنکا کو 59 رن سے شکست دے کر خواتین کے ورلڈ کپ میں فاتحانہ شروعات کی۔
بارش سے متاثرہ میچ میں ہندوستان نے آٹھ وکٹوں پر 269 رن بنائے۔ سری لنکا کو ڈک ورتھ لوئس طریقہ کار کے تحت جیت کے لئے 271 رنز کا ہدف دیا گیا لیکن اس کی پوری ٹیم 45.4 اوورز میں 211 رنز پر آل آؤٹ ہو گئی۔
ہندوستان نے عمدہ بولنگ کا مظاہرہ کرتے ہوئے سری لنکا کو مسلسل دباؤ میں رکھا اور اسے کوئی موقع نہیں دیا۔ سری لنکا کی جانب سے کپتان چماری اٹاپٹو (43) اور نیلاکشی ڈی سلوا (35) کے علاوہ کوئی اور بلے باز ہندوستانی گیند بازوں کا سامنا نہیں کر سکا۔ ہرشیتھا سمارا وکراما نے 28 رنوں کا تعاون دیا۔
ہندوستان کی اننگ میں شاندار نصف سنچریاں بنانے والی امنجوت اور دیپتی نے گیندبازی میں بھی اچھی کارکردگی دکھاتے ہوئے وکٹیں حاصل کیں۔ دیپتی نے 54 رن پر تین اور امنجوت نے 37 رن پر ایک وکٹ حاصل لیا۔ اسنیہ رانا اور شری چرنی نے دو دو وکٹیں حاصل کیں۔
تعاقب کے دوران، ہندوستان کو سری لنکا سے صرف ایک بار خطرہ محسوس ہوا، وہ تھا کپتان اٹا پٹو اور ہرشیتھا سماراویکرما کے درمیان دوسرے وکٹ کی شراکت کے دوران۔ جب ہندوستان کی یارکر گیندوں کی بوچھاڑ سے اسے توڑا، تو سری لنکا کی اننگ پوری طرح سے لڑکھڑا گئی۔
سری لنکا نے ٹاس جیت کر پہلے گیندبازی کا فیصلہ کیا۔ اس مقابلے میں بارش سے دو مرتبہ خلل پڑا۔ پہلے اووروں کی تعداد گھٹا کر 48 اور پھر 47 کر دی گئی۔ ہندوستان نے اپنے چھ وکٹ محض 124 رنز پر گنوا دیے تھے لیکن امنت جوت اور دیپتی کی نصف سنچریوں نے ہندوستانی اننگ کو سنبھال لیا۔ دیپتی آخری گیند پر آؤٹ ہوئیں۔
امن جوت کور ورلڈ کپ میں نمبر آٹھ پر بلے بازی کرتے ہوئے نصف سنچری بنانے والی دوسری کھلاڑی بن گئیں۔ یہ نمبر آٹھ بلے باز کا ورلڈ کپ میں بہترین اسکور بھی ہے۔ امن جوت نے 56 گیندوں پر 57 رنز بنائے، جن میں پانچ چوکے اور ایک چھکا شامل تھا جبکہ دیپتی نے 53 گیندوں پر 53 رنز میں تین چوکے لگائے۔
ایک وقت ایسا لگ رہا تھا کہ ہندوستان کی خاتون ٹیم 200 رن کا اسکور بھی نہیں بناسکے گی۔ رناویرا نے ایک ہی اوور میں تین جھٹکے دیتے ہوئے ہندوستان کو بیک فٹ پر دھکیل دیا تھا۔ ہرلین دیول اور جیمیمہ روڈریگز کے بعد ہرمن پریت کور بھی پویلین لوٹ گئیں۔ اس کے بعد اپنے اگلے ہی اوور میں رناویرا نے رچا گھوش کو بھی شکار بنایا اور ہندوستان محض 124 کے اسکور پر چھ وکٹ گنوا بیٹھا۔ لیکن یہاں سے دیپتی شرما اور امنجوت کور کے درمیان شاندار سنچری شراکت ہوئی اور دونوں نے ہی نصف سنچریاں مکمل کیں۔ اس کے بعد اسنیہا رانا کی تیز بلے بازی کی بدولت ہندوستان نے اسکور بورڈ پر 269 رنز جوڑ لیے۔
پرتیک راول نے 37 اور ہرلین دیول نے 48 رنز کا تعاون دیا جبکہ اسمرتی مندھانا 8 اور کپتان ہرمن پریت کور 21 رنز بنا کر آؤٹ ہوئیں۔ جیمیمہ روڈرگز کھاتہ بھی نہ کھول سکیں۔ اسنیہا رانا نے 15 گیندوں پر ناٹ آوٹ 28 رنز بنائے، جس میں دو چوکے اور دو چھکے شامل تھے۔
سری لنکا کی جانب سے انوکا رناویرا نے 47 رنز کے عوض سب سے زیادہ چار وکٹیں حاصل کیں۔