جھارکھنڈ کے گھاٹ شیلا ضمنی انتخاب کے لیے حتمی ووٹر لسٹ جاری، 2.55 لاکھ سے زیادہ ووٹرز

رانچی، 29 ستمبر (یو این آئی) ضلع الیکشن افسر اور مشرقی سنگھ بھوم کے ڈپٹی کمشنر کرنا ستیارتھی نے پیر کے روز جھارکھنڈ میں گھاٹ شیلااسمبلی ضمنی انتخاب کے لیے حتمی ووٹر لسٹ جاری کردی ہے ۔ تازہ ترین اعداد و شمار کے مطابق گھاٹ شیلا اسمبلی حلقہ میں 2,55,823 ووٹر اپنا حق رائے دہی استعمال کریں گے ۔ ان میں 1,24,899 مرد، 1,30,921 خواتین اور تین تیسری جنس کے ووٹرز شامل ہیں۔ اب سب کی نگاہیں اس پر مرکوزہیں کہ یہ 2.55 لاکھ سے زیادہ ووٹر کس کو ووٹ دیں گے اورگھاٹ شیلا کانیا نمائندہ کون ہوگا۔۔
ڈسٹرکٹ الیکشن آفس کی طرف سے کی گئی ایک حالیہ نظر ثانی میں، 5,253 نئی درخواستیں موصول ہوئیں جن میں سے 5,171 کو منظور کیا گیا۔ اس دوران ووٹر لسٹ سے 715 نام نکالے گئے ۔ اس کے نتیجے میں، ووٹروں کی کل تعداد میں 4,456 کا اضافہ ہوا، اور گھاٹ شیلا میں اب 2,55,820 رجسٹرڈ ووٹرز ہیں۔
18 سے 19 سال کی عمر کے ووٹرز کی تعداد بھی تیزی سے بڑھ کر 16,178 ہوگئی ہے ۔ 85 سال سے زائد عمر کے تجربہ کار ووٹرز کی تعداد کم ہو کر 629 رہ گئی ہے ۔ سروس ووٹرز کی تعداد بھی بڑھ کر 368 ہو گئی ہے ۔
گھاٹ شیلا اسمبلی حلقہ میں 300 بوتھ بنائے گئے ہیں۔ ان میں سے کسے غیر محفوظ قرار دیاجائے گا اس پر ضلعی انتظامیہ چھ مراحل میں جانچ کر رہاہے ۔ حتمی فہرست جلد تیار ہو گی۔
گھاٹ شیلا ضمنی انتخاب میں جے ایم ایم اور بی جے پی کے درمیان سخت مقابلے کی امید ہے ۔ ذرائع کے مطابق سابق وزیر تعلیم رام داس سورین کے خاندان کو جے ایم ایم سے ٹکٹ ملنا تقریباً طے ہے ۔ دریں اثنا، بی جے پی کیمپ کے اندر سابق وزیراعلیٰ چمپئی سورین کے بیٹے بابولال سورین اوررمیش ہنسدا کے درمیان رسہ کشی جاری ہے ۔