اے سی میلان اور اے ایس روما کی فتوحات

روم 29 ستمبر(یو این آئی ) اٹلی کے فٹبال کلب اے سی میلان اور اے ایس روما نے سیری اے فٹ بال لیگ میں اپنے اپنے میچز جیت لئے۔اے سی میلان نے ناپولی کو سخت مقابلے کے بعد 1-2 گول سے ہرا دیا جبکہ اے ایس روما نے ہیلس ویرونا کو 0-2 گول سے مات دی۔ امریکی ویب سائٹ ای ایس پی این کے مطابق سیری اے فٹ بال لیگ کا 124 واں سیزن اٹلی میں جاری ہے جس میں شائقین فٹ بال کو انتہائی دلچسپ اور کانٹے دار مقابلے دیکھنے کو مل رہے ہیں۔
سٹیڈیو جیوسیپ میزا، میلانو کے مقام پر کھیلے گئے لیگ کے اہم میچ میں اے سی میلان اور ناپولی کی ٹیمیں آمنے سامنے تھیں جس میں اے سی میلان کی ٹیم نے سخت مقابلے کے بعد ناپولی کی ٹیم کو ایک کے مقابلے میں 2 گول سے ہرا دیا۔
الیکسس سیلیمیکرز نے میچ کے تیسرے اور کرسچن پلسک نے 31 منٹ میں گول سکور کئے ۔ناپولی کی جانب سے واحد گول کیون ڈی بروئن نے 60 ویں منٹ پر سکور کیا۔
یہ اے سی میلان کی سیری اے میں چوتھی فتح ہے۔سٹیڈیو اولمپیکو، روما، اٹلی میں کھیلے گئے ایک اور میچ میں اے ایس روما اور ہیلس ویرونا کی ٹیمیں آمنے سامنے تھی جس میں اے ایس روما کی ٹیم نے عمدہ کھیل پیش کرتے ہوئے ہیلس ویرونا کو 0-2 گول سے ہرا دیا۔ یہ اے ایس روما کی سیری اے میں چوتھی فتح ہے۔ اے ایس روما کی جانب سے آرٹیم ڈوبیک اور میٹیاس سولی نے ایک، ایک گول کر کے اپنی ٹیم کو فتح دلائی۔اے ایس روما اس فتح کے بعد 12پوائنٹس کے ساتھ ٹیبل پر تیسرے نمبر پر موجود ہے۔