مورکل نے ہاردک اور ابھیشیک کی فٹنیس تشویشات کو کیا مسترد

دبئی، 27 ستمبر (یو این آئی) ہندوستان کے بالنگ کوچ مارنے مورکل نے ہاردک پانڈیا اور ابھیشیک شرما کی فٹنیس کے تعلق سے اٹھ رہے سوالوں کو مکمل طور پر مسترد کر دیا ہے۔ اتوار کو دبئی میں پاکستان کے خلاف ایشیا کپ فائنل سے پہلے ہاردک اور ابھیشیک کی فٹنیس کے تعلق سے سوال اٹھے تھے لیکن گیندبازی کوچ کے بیان کے بعد سب کچھ صاف ہو گیا۔
ہاردک جمعہ کو سری لنکا کی اننگز کا پہلا اوور پھینکنے کے بعد میدان سے باہر چلے گئے تھے۔ ایسا ظاہر ہو رہا تھا کہ ان کے ہیمسٹرنگ میں مسئلہ پیدا ہوگیا ہے۔ اسی اوور میں انہوں نے کسل مینڈس کو آؤٹ کیا تھا۔ اس کے بعد وہ پوری اننگز میں میدان پر واپس نہیں آئے۔
مورکل نے میچ کے بعد پریس کانفرینس میں کہا ’’ہاردک کو کریمپس آ رہے تھے۔ آج رات اور کل صبح ان کی جانچ ہوگی، اس کے بعد ہی فیصلہ لیا جائے گا۔‘‘ ہندوسان کے بالنگ کوچ نے وہی کہا جو کپتان سوریہ کمار یادو نے میچ پریزینٹیشن کے دوران کہا تھا۔
اس دوران ابھیشیک بھی سری لنکا کی اننگز کے دوران پہلے 10 اوور کے بعد میدان سے باہر رہے۔ نویں اوور میں فیلڈنگ کرتے ہوئے، انہوں نے اپنے داہنے پیر کی جانگھ کو پکڑکر تکلیف ظاہر کی اور 10ویں اوور میں میدان چھوڑکر باہر چلے گئے۔ اسی وقت پتھم نسنکا کے ایک سکسر کو ڈیڈ بال قرار دیا گیا تھا، کیونکہ ابھیشیک گیندباز ورون چکرورتی کے رن اپ شروع کرنے سے پہلے میدان سے باہر نہیں گئے تھے۔
ہاردک کی طرح ابھیشیک کا بھی باقی اننگز میں برف اور پکل جوس سے کریمپ کا علاج کیا گیا۔ رنکو سنگھ، شیوم دوبے اور جتیش شرما الگ الگ موقعوں پر سبسٹی ٹیوٹ فیلڈر کے طور پر میدان پر آئے۔ ایک وقت تک ورما بھی کچھ دیر کے لیے باہر گئے، لیکن ہائڈریشن بریک لینے کے بعد وہ میدان پر واپس آگئے۔
ہندوستان اور سری لنکا کا میچ سپر اوور تک گیا تھا۔ اس کی وجہ سے میچ طے شدہ وقت سے زیادہ دیر تک چلا۔ ایسے میں ہندوستانی کھلاڑیوں کے پاس اتوار کو پاکستان کے خلاف ہونے والے فائنل سے پہلے ری کوری کے لیے کافی کم وقت ہے۔ مورکل نے کھلاڑیوں کے آرام پر زور دیا اور کہا کہ ہفتے کے روز کوئی ٹریننگ نہیں ہوگی۔
انہوں نے کہا ’’کھلاڑیوں کے لیے آرام کرنا سب سے زیادہ ضروری ہے۔ وہ آئس باتھ لے رہے ہیں۔ میچ ختم ہوتے ہی ری کوری شروع ہو گئی ہے۔ ری کوری کا سب سے اچھا طریقہ نیند اور پیروں کو آرام دینا ہے۔ امید ہے کہ وہ اچھی نیند لے سکیں گے۔
’’کھلاڑیوں کے لیے الگ الگ پول سیشن رکھے جا ئیں گے۔ پھر مساج ہو ں گی تاکہ وہ اتوار کے بڑے مقابلے کے لیے ذہنی طور پر تیار ہو سکیں۔‘‘’ارشدیپ اور ہرشت ایکس فیکڑ ہیں‘۔
مورکل نے ارشدیپ سنگھ اور ہرشت رانا جیسے کھلاڑیوں کی چنوتیوں پر بھی بات کی۔ سری لنکا کے خلاف جمعہ کو دونوں نے آٹھ اوور میں 100 رن دے کر کل دو وکٹ حاصل کئے، لیکن سپر اوور میں ارشدیپ نے شاندار گیندبازی کرکے ہندوستان کو جیت دلائی۔
انہوں نے کہا ’’وہ ٹریننگ میں جس طرح کی محنت کرتے ہیں، ہم امید کرتے ہیں کہ میدان پر اس کا نتیجہ نظر آئے گا۔ کبھی کبھی میچ پریکٹس کی کمی اثر ڈال سکتی ہے۔ آپ نیٹس میں کتنے بھی اوور ڈال لیں، لیکن میچ کے تجربے کا کوئی جواب نہیں ہے۔ لیکن ٹیم جیت رہی ہے۔ وہ سبھی ایکس فیکڑ کھلاڑی ہیں اور اصل میچ ونر ہیں۔