گروگرام: تصادم میں دو گینگسٹر گرفتار، دو پولیس اہلکار زخمی

نئی دہلی، 26 ستمبر (یو این آئی): دارالحکومت اورقومی راجدھانی خطے میں پولیس نے مجرموں کے خلاف بڑی کارروائی کی ہے ، جمعہ کی صبح تقریباً ساڑھے چار بجے گروگرام کے سیکٹر-99 میں دہلی پولیس کی اسپیشل سیل اور گروگرام سی آئی اے سیکٹر-40 کی مشترکہ ٹیم نے ایک تصادم کے بعد نجف گڑھ کے مشہور نیرج تہلان قتل کیس میں مطلوب دو مجرموں کو گرفتار کیا ہے ۔
ایڈیشنل کمشنر پرمود سنگھ کشواہا نے بتایا کہ گرفتار ملزمین کی شناخت موہت جاکھڑ (29) اور جتن راجپوت (21) کے طور پر ہوئی ہے ۔ پولیس حکام کے مطابق ملزمین نے گھیرا بندی دیکھتے ہی فائرنگ شروع کر دی۔
گینگسٹر کی جانب سے ہوئی چھ راؤنڈ فائرنگ میں ایک گولی حولدار نارپت کی بُلیٹ پروف جیکٹ پر لگی، جبکہ دوسری گولی ایس آئی وکاس کے بائیں ہاتھ پر لگی ہے ۔ جوابی فائرنگ میں دونوں ملزمین کے پیروں میں گولیاں لگیں۔ پولیس نے انہیں فوراًگرفتار کر لیا اور علاج کے لیے سیکٹر-10 سول اسپتال، گروگرام میں داخل کرایا۔ زخمی پولیس اہلکاروں کو بھی اسپتال میں ابتدائی طبی امداد دی گئی ہے ۔
در اصل چار جولائی کو نجف گڑھ کے کاروباری نیرج تہلان کے قتل کے بعد سے دونوں ملزمین مسلسل ٹھکانے بدل رہے تھے ، مقام بدل کر اور فون بند رکھ کر پولیس کو چکمہ دیتے رہے ، لیکن دہلی پولیس اسپیشل سیل کی ٹیم نے تکنیکی نگرانی اور خفیہ ذرائع کی مدد سے ٹھکانے معلوم کر لیے ۔ اس کے بعد سیل اور گروگرام سی آئی اے نے مشترکہ آپریشن کرکے آج صبح سویرے جال بچھایا، جیسے ہی ملزمین اسپلنڈر موٹرسائیکل پر نظر آئے ، پولیس نے انہیں گھیر لیا، پولیس نے ان کے پاس سے دو بھری ہوئی پستول، پانچ گولیاں اور ایک اسپلنڈر موٹرسائیکل قبضے میں لی ہے ، فارنسک ٹیم ہتھیاروں کی جانچ کرے گی، بائیک کے رجسٹریشن کی بھی تفتیش جاری ہے ۔
حکام کا کہنا ہے کہ تفتیش میں یہ معلوم کیا جائے گا کہ کیا قتل میں یہی ہتھیاراستعمال ہوئے تھے ؟ ایڈیشنل کمشنر نے بتایا کہ مجرم انتہائی خطرناک اور پیشہ ور ہیں۔
علاج کے بعد ملزمین کو گرفتار کرکے دہلی لایا جائے گا اور عدالت میں پیش کیا جائے گا۔ تفتیش میں قتل کی سازش اور معاونین کے تعلق سے بھی معلومات ملنے کی امید ہے ۔ پولیس کا کہنا ہے کہ اس گینگ کے باقی اراکین کی گرفتاری کے لیے چھاپہ ماری کی تیاری جاری ہے ۔
ایڈیشنل کمشنر نے کہا کہ دہلی پولیس کا مقصد منظم جرائم پر سخت کارروائی کرنا ہے ، چاہے مجرم کتنے ہی ہوشیار کیوں نہ ہوں، پولیس انہیں گرفتار کرنے میں کامیاب رہتی ہے ، یہ کارروائی ہماری ٹیم کی ہوشیاری اور تکنیکی مہارت کا نتیجہ ہے ۔