آسٹن ولا سے یوروپا لیگ میں عمدہ کارکردگی کی امید ہے :اونائی ایمری

پیرس23 ستمبر (یو این آئی ) آسٹن ولا کے منیجر اونائی ایمری نے امید ظاہر کی ہے کہ یوروپا لیگ میں واپسی سے ان کی ٹیم کی خراب فارم میں بہتر ی آئے گی جبکہ ناٹنگھم فارسٹ تین دہائیوں بعد اپنی یورپی مہم کا آغاز کرے گا۔یوروپا لیگ کی تاریخ کے سب سے کامیاب کوچ سمجھے جانے والے اونائی ایمری کی کوچنگ میں تین بار سیویّا اور ایک بار ویارئیل نے ٹائٹل جیتا اور 2019 میں آرسنل کی ٹیم نے بھی فائنل کے لئے کو الیفائی کیا۔
تاہم ان کی موجودہ ٹیم آسٹن ولا نے سیزن کی شروعات مایوس کن انداز میں کی ہے۔آسٹن ولا نے انگلش پریمیئر لیگ کے پہلے پانچ میچز میں کوئی فتح حاصل نہیں کی، اور ٹیم نے گزشتہ روز 10 کھلاڑیوں والی سنڈرلینڈ کے خلاف 1-1 سے میچ ڈرا کر کے سیزن کا پہلا گول سکور کیا۔
میچ کے بعد اونائی ایمری نے کہاکہ ہماری شروعات اچھی نہیں رہی۔ انہوں نے کہا کہ مجھے اپنی ٹیم کی اس کارکردگی پر بہت مایوسی ہوئی ہے ، لیکن کام جاری ہے۔
کچھ کھلاڑی ٹیم میں نئے ہیں اور انھیں بہتر ہونے میں وقت لگے گا۔ دوسرے کھلاڑی گزشتہ سیزن سے ہمارے ساتھ ہیں اور جانتے ہیں کہ ٹیم کو کیسے آگے بڑھانا ہے۔یاد رہے کہ آسٹن ولا نے گزشتہ سیزن میں چیمپیئنز لیگ کے کوارٹر فائنل تک رسائی حاصل کی تھی، جہاں وہ پیرس سینٹ جرمین کے ہاتھوں 4-5 کے مجموعی سکور سے ہار گئے تھے۔دوسری جانب ناٹنگھم فارسٹ 30 سال بعد کسی یورپی مقابلے میں حصہ لے رہی ہے، جو کلب کے شائقین کے لیے ایک تاریخی لمحہ ہے