جی ایس ٹی اصلاحات سے دکانداروں کے ساتھ ساتھ صارفین کو فائدہ ہوگا: سود

نئی دہلی، 22 ستمبر (یو این آئی) دہلی کے وزیر تعلیم مسٹر آشیش سود نے کہا کہ جی ایس ٹی اصلاحات سے نہ صرف دکانداروں کی فروخت میں اضافہ ہوگا بلکہ صارفین کو بھی فائدہ ہوگا۔
مسٹر سود نے وزیر اعظم نریندر مودی کی طرف سے متعارف کرائے گئے جی ایس ٹی اصلاحات کے بارے میں لوگوں کو آگاہ کرنے کے لیے آج جنک پوری اسمبلی حلقہ کا دورہ کیا۔ جنک پوری کے متعدد تاجر اور مقامی باشندے بھی موجود تھے ۔ انہوں نے کہا کہ یہ اصلاحات آج سے نافذ ہو گئی ہیں۔ ان کا مقصد کاروبار کو آسان بنانا، ٹیکس کے نظام کو شفاف بنانا، اور عام لوگوں کے لیے سامان کی خریداری کو مزید سستا بنانا ہے ۔
انہوں نے کہا کہ جی ایس ٹی اصلاحات سے متوسط طبقے کے خاندانوں، سروس ورکرز، چھوٹے دکانداروں اور کاروباری مالکان کو فائدہ پہنچے گا۔
انہوں نے مقامی تاجروں کی دکانوں کا دورہ کیا اور ذاتی طور پر ان سے بات چیت کی اور تفصیل سے بتایا کہ ان نئی اصلاحات سے نہ صرف تاجروں بلکہ صارفین کو بھی براہ راست فائدہ پہنچے گا۔ انہوں نے تاجروں اور لوگوں کو بتایا کہ کس طرح وزیر اعظم نے دیوالی سے پہلے دہلی کے لوگوں کو دیوالی کا تحفہ دیا ہے ۔