اکشر پٹیل زخمی، پاکستان کے ساتھ میچ میں کھیلنا مشکوک

ابوظہبی، 20 ستمبر (یواین آئی) اکشر پٹیل اتوار کو پاکستان کے خلاف ہندوستان کے سپر فور میچ سے محروم ہوسکتے ہیں۔ ابوظہبی میں عمان کے خلاف گروپ اے کے میچ میں فیلڈنگ کے دوران ان کے سر پر لگی تھی۔
اکشر 15ویں اوور میں انجری کا شکار ہوئے۔ حماد مرزا کا کیچ لینے کے لیے مڈ آف سے بھاگتے ہوئے اپنا توازن کھو بیٹھے اور سر زمین پر ٹکرا کر گر گئے۔ اس کے بعد انہیں اپنا سر اور گردن پکڑے ہوئے دیکھا گیا اور ایک فزیو اسے میدان سے باہر لے گیا۔ وہ عمان کی اننگز کے بقیہ حصے میں میدان میں واپس نہیں آئے۔
اکشر نے چار رنز دے کر صرف ایک اوور پھینکا۔ ہندوستان نے اس میچ میں کل آٹھ گیند بازوں کا استعمال کیا اور 21 رنز سے کامیابی حاصل کی۔
میچ کے بعد کی پریس کانفرنس میں ہندوستانی فیلڈنگ کوچ ٹی دلیپ نے کہا کہ اکشر اچھی کارکردگی کا مظاہرہ کر رہے ہیں۔ تاہم انہوں نے میچوں کے درمیان مختصر وقت پر تشویش کا اظہار کیا۔ دبئی میں پاکستان کے خلاف اپنے اگلے میچ میں ہندوستان کے پاس 48 گھنٹے سے بھی کم وقت ہوگا۔
اکشر نے بلے بازی سے اچھی کارکردگی کا مظاہرہ کیا۔ پانچویں نمبر پر آتے ہوئے انہوں نے 13 گیندوں پر 26 رنز کی تیز رفتار اننگز کھیلی۔ اس دوران انہوں نے اور سنجو سیمسن نے چوتھی وکٹ کے لیے 45 رنز کی شراکت داری کی۔
اگر اکشر کسی وجہ سے پاکستان کے خلاف میچ سے باہر ہو جاتے ہیں تو ٹیم کے لیے تین اسپنرز کو میدان میں اتارنا مشکل ہو سکتا ہے۔ یہ تبھی ممکن ہوگا جب کسی اور کھلاڑی کو بلایا جائے۔ ورون چکرورتی اور کلدیپ یادو اس وقت ٹیم میں صرف دو ماہر اسپنر ہیں۔
اگر ضرورت پڑی تو ہندوستان کے پاس اسٹینڈ بائی لسٹ میں ریان پراگ اور واشنگٹن سندر جیسے اچھے آپشنز ہیں جنہیں ٹیم میں شامل کیا جا سکتا ہے۔