سپر فور کے لیے افغانستان اور سری لنکا کا مقابلہ

ابوظہبی، 17 ستمبر (یو این آئی) سری لنکا اور افغانستان 2025 ایشیا کپ کے سپر فور میں جگہ کے لیے جمعرات کو ٹکرائیں گے۔ افغانستان کو ٹورنامنٹ میں کرو یا مرو کی صورتحال کا سامنا ہے، سری لنکا اپنے آخری پانچ ٹی ٹوئنٹی میچوں میں سے چار جیت کر اعتماد سےلبریز ہے۔
زید کرکٹ اسٹیڈیم میں کل ہونے والے میچ میں سری لنکا کوبرتری حاصل ہے۔ اوپنرز خاص طور پر پتھم نسانکا، بہترین فارم میں ہیں، جو تیز شروعات فراہم کرتے ہیں۔
چرت اسالنکا بھی فارم میں ہیں۔ کوسل مینڈس اور کوسل پریرا اننگز کی مضبوط بنیاد رکھ سکتے ہیں، جبکہ وانندو ہسرنگا اور داسن شاناکا جیسے پاور ہٹر ایک ہی اوور میں میچ کا رخ بدل سکتے ہیں۔ بالنگ کے لحاظ سے دشمنتھا چمیرا اور نووان تھشارا ابتدائی طور پرخطرناک ہو سکتے ہیں، جبکہ اسپنرز مہیش تھیکشنا اور ہسرنگا درمیانی اوورز میں کسی بھی موڑ کا فائدہ اٹھا سکتے ہیں۔
راشد خان کی قیادت میں افغانستان کی ٹیم کے لیے یہ ایک کڑا امتحان ہوگا۔ بیٹنگ لائن اپ وہی برقرار ہے، رحمان اللہ گرباز اور صدیق اللہ اٹل سے امیدیں وابستہ ہیں، لیکن انہیں دباؤ میں مزید مستقل مزاجیکا مظاہرہ کرنا ہو گا۔ محمد نبی اور گلبدین نائب سمیت مڈل آرڈر کولمبی پارٹنرشپ بنانے کی ضرورت ہوگی، جبکہ افغانستان کو میچ میں رہنا ہے تو راشد کی لیگ اسپن اور ڈیتھ اوور بولنگ کی مہارتیں اہم ہوں گی۔
جہاں تک پچ کا تعلق ہے شیخ زید کی پچ پہلے بیٹنگ کرنے والی ٹیموں کے حق میں ہے۔ اسپنر یہاں گیند کا رخ موڑ سکتے ہیں، جبکہ تیز گیند بازوں کو جلد رفتار تلاش کرنے کی ضرورت ہے۔ حالیہ میچوں میں اہداف کا تعاقب مشکل رہا ہے، جس کی وجہ سے ٹاس کا اہم رول ہوگا۔